اسلام آباد (پی این آئی) صدر آزاد جموں وکشمیر بیرسٹر سلطان محمود چوہدری نے کہا ہے کہ آئرش پارلیمنٹ میں جلد ہی کشمیر کمیٹی قائم کر دی جائے گی۔اس بات کا فیصلہ میرے آئر لینڈ کے دورے کے دوران کیا گیا تھا۔ آئرش پارلیمنٹ میں کشمیر کمیٹی کی تشکیل سے مسئلہ کشمیر کو انٹرنیشنل فورمز بالخصوص یورپ میں اُٹھانے میں بھرپور مدد ملے گی۔ لہذا آئرلینڈ میں مقیم کشمیری مسئلہ کشمیر کو اُجاگر کرنے کے لئے اپنا رول ادا کریں۔
اس سلسلے میں یورپی ممبران پارلیمنٹ سے بھی مسئلہ کشمیر کو اُجاگر کرنے کے لئے بات چیت کی جائے۔میرے دورہ آئرلینڈ کے دوران لانگفورڈ کونسل کی عمارت پر آزادکشمیر کا جھنڈا لہرایا گیا اور اس کے تحریک آزادی کشمیر پر دوررس اثرات مرتب ہونگے۔ ان خیالات کا اظہار انہوں نے آج یہاں ایوان صدر کشمیر ہاؤس اسلام آباد میں کشمیر پیس فورم انٹرنیشنل آئرلینڈ کی سینئر نائب صدر سعدیہ بٹ سے ملاقات کے دوران گفتگو کرتے ہوئے کیا۔ اس موقع پر کشمیر پیس فورم انٹرنیشنل آئرلینڈ کی سینئر نائب صدر سعدیہ بٹ نے صدر آزادجموں وکشمیر بیرسٹر سلطان محمود چوہدری کو آئرلینڈ میں کشمیر پیس فورم انٹرنیشنل کی آئرلینڈ میں مسئلہ کشمیر کو اُجاگر کرنے کے حوالے سے جاری سرگرمیوں پر بریفنگ دیتے ہوئے بتایا کہ کشمیر پیس فورم انٹرنیشنل آئرلینڈ کے صدر پیر شیراز حسین کی قیادت میں ہم بھرپور انداز میں مسئلہ کشمیر کو اُجاگر کرنے کے لئے کام کر رہے ہیں۔ اس موقع پر کشمیر پیس فورم انٹرنیشنل آئر لینڈ کی سینئر نائب صدر سعدیہ بٹ نے صدر آزاد جموں وکشمیر بیرسٹر سلطان محمود چوہدری کو آئرلینڈ کے دورے کی دعوت دی جو انہوں نے قبول کر لی دورے کی تاریخ کا اعلان مناسب وقت پر کیا جائے گا۔ اس موقع پر صدر آزاد جموں وکشمیر بیرسٹر سلطان محمود چوہدری نے مزید کہا کہ آئرلینڈ اور کشمیر میں مماثلت ہے اس لئے آئرلینڈ کی حکومت اور عوام مسئلہ کشمیر کو بہتر انداز میں سمجھ سکتے ہیں اس لئے آئر لینڈ مسئلہ کشمیر کو حل کرانے میں اپنا کردار ادا کرے۔ ۔۔۔
