پاکستان نے 19 جون سے نئی دہلی میں ہونے والی ایشین سینئر فینسنگ چیمپئن شپ میں اپنی ٹیم نہ بھیجنے کا فیصلہ کیا ہے۔
ایشین سینئر فینسنگ چیمپئن شپ میں ایشیا اور اوشیانا کے 30 سے زائد ممالک کے صفِ اول کے فینسرز شرکت کریں گے، جس کے باعث یہ رواں سال خطے کے سب سے بڑے فینسنگ مقابلوں میں شمار ہو رہا ہے۔
ایونٹ کے دوران تقریباً 100 بین الاقوامی مندوبین اور تکنیکی حکام بھی نئی دہلی پہنچیں گے، جو مقابلوں کی نگرانی اور انتظامی امور سنبھالیں گے۔
پاکستانی فینسنگ فیڈریشن کی جانب سے تاحال اس بات کی باضابطہ وضاحت نہیں کی گئی کہ ٹیم کو ایونٹ میں نہ بھیجنے کا فیصلہ کیوں کیا گیا ہے۔ تاہم پاکستان اور بھارت کے درمیان کھیلوں کے تعلقات ماضی میں بھی انتظامی رکاوٹوں، ویزا مسائل اور وسیع تر سفارتی پیچیدگیوں سے متاثر ہوتے رہے ہیں۔
نئی دہلی میں ہونے والی اس چیمپئن شپ سے پاکستان کی عدم شرکت دونوں ممالک کے درمیان کھیلوں کے شعبے میں پائے جانے والے تعطل کی ایک اور مثال سمجھی جا رہی ہے، جہاں سیاسی کشیدگی کا اثر اکثر کھلاڑیوں پر بھی پڑتا ہے۔
اگرچہ کرکٹ کے معاملات زیادہ توجہ حاصل کرتے ہیں، تاہم دیگر کھیلوں کی فیڈریشنز اور ریگولیٹری اداروں کو بھی حکومتی منظوریوں، سفری انتظامات اور دیگر لاجسٹک مسائل کا سامنا رہتا ہے۔
تازہ ترین خبروں کے لیے پی این آئی کا فیس بک پیج فالو کریں
