*پی ایس ایل 12 کا اعلان، ٹورنامنٹ 18 مارچ سے 2 مئی 2027 تک ہوگا*
پاکستان کرکٹ بورڈ نے پی ایس ایل کے 12ویں ایڈیشن کی تاریخوں کا اعلان کر دیا۔ لیگ 18 مارچ سے 2 مئی 2027 تک کھیلی جائے گی، جس میں 8 فرنچائزز ٹائٹل کے لیے مدمقابل ہوں گی۔
پی سی بی کے مطابق پی ایس ایل گورننگ کونسل کا اجلاس یکم ستمبر 2026 کو لندن میں ہوا، جس میں تمام 8 فرنچائزز کے مالکان نے شرکت کی۔ مشاورت کے بعد ٹورنامنٹ ونڈو کو حتمی شکل دی گئی۔
*پی ایس ایل 11 تاریخی سیزن تھا*
پی سی بی نے بتایا کہ پی ایس ایل 2026 لیگ کی تاریخ کا سب سے بڑا سیزن تھا۔ پہلی بار 8 ٹیموں نے شرکت کی اور ڈرافٹ کی جگہ پلیئر آکشن متعارف کرایا گیا۔ لاہور قذافی اسٹیڈیم میں فائنل میں 32 ہزار 461 تماشائی آئے جو لیگ کی ریکارڈ حاضری تھی۔ فائنل میں پشاور زلمی نے ڈیبیو ٹیم حیدرآباد کنگزمین کو 5 وکٹوں سے شکست دے کر 9 سال بعد دوسرا ٹائٹل جیتا۔
*آگے کیا ہوگا؟*
پی ایس ایل 12 کے لیے اب ڈائریکٹ سائننگز، ریٹینشن، ٹریڈ ونڈو اور پلیئر آکشن ہوں گے، جس کے بعد اسکواڈز فائنل ہوں گے۔
چیئرمین پی سی بی محسن نقوی نے کہا کہ پی ایس ایل 11 نے دنیا کو لیگ کی صلاحیت دکھا دی، ریکارڈ کراؤڈ اور براڈکاسٹ نے سب کی توجہ کھینچی، پی ایس ایل 12 میں معیار مزید بلند ہوگا۔
چیف ایگزیکٹو سلمان نصیر نے کہا کہ گزشتہ سیزن نے توقعات بدل دی ہیں، 2027 میں ان پر پورا اتریں گے۔ 8 ٹیمیں بہترین کارکردگی کے لیے تیار ہیں اور کروڑوں شائقین پی ایس ایل 12 کا انتظار کر رہے ہیں۔
