*خواجہ آصف: پیپلزپارٹی اپنی ساکھ کھو چکی، پی ٹی آئی کو رویہ بدلنا ہوگا*
مسلم لیگ ن کے رہنما اور وزیر دفاع خواجہ آصف کا کہنا ہے کہ پیپلزپارٹی اپنی سیاسی حیثیت کھو چکی ہے اور اب اپنی بقا کے لیے صوبائی معاملات کو سندھ اسمبلی میں اٹھا رہی ہے۔
اے آر وائی نیوز کے پروگرام میں بات کرتے ہوئے انہوں نے کہا کہ آصف زرداری قابلِ احترام ہیں لیکن موجودہ قیادت پارٹی کو اس کا سابقہ مقام واپس دلانے میں ناکام رہی ہے۔
ان کا کہنا تھا کہ ملک کا موجودہ نظام مفلوج ہو چکا ہے۔ مضبوط بلدیاتی نظام اور نئے انتظامی یونٹس کے بغیر نظام نہیں چل سکتا۔ جمہوریت پر یقین ہے تو اسے نچلی سطح تک لانا ہوگا۔
*پی ٹی آئی پر تنقید*
خواجہ آصف نے کہا کہ پی ٹی آئی نے پچھلے 2-3 سال میں جو رویہ اختیار کیا ہے اسے بدلنا پڑے گا۔ سوشل میڈیا پر استعمال ہونے والی زبان سب کے سامنے ہے۔ اب ٹیکنالوجی کے دور میں کچھ چھپا نہیں رہتا۔
“برطانیہ سے بیانات دینے کے بجائے بانی پی ٹی آئی کے بچوں کو چاہیے کہ وہ آ کر اپنے والد سے ملاقات کریں۔ انہیں ملنے سے کسی نے نہیں روکا۔”
انہوں نے مزید کہا کہ پی ٹی آئی نے کسی قومی مسئلے پر نظام کے اندر رہ کر بات نہیں کی۔ وہ آتے ہی صرف بانی کا ذکر کرتے ہیں۔ سیاست اس طرح نہیں چلتی۔
