لاہور(پی این آئی) وزیر مملکت زرتاج گل نے کہا ہے کہ الیکشن ایکٹ کے تحت 30دن پہلے یا بعد میں الیکشن ہوسکتا ہے،عبوری حکومت ہی کیوں نہ آجائے سینیٹ ہر حال میں چلے گا،اپوزیشن کی ساری سرکس سینیٹ الیکشن رکوانے کیلئے ہورہی ہے۔ انہوں نے نجی ٹی وی سے گفتگو میں بتایا کہ پی ڈی ایم نے سردی اور میڈیا
دونوں کو جلسے کی ناکامی کی وجہ قرار دیا ہے ،جلسے میں لوگ ہی نظر نہیں آرہے تھے۔سینیٹ الیکشن رکوانے کیلئے ساری سرکس اس لیے ہورہی ہے، ان کو سینیٹ کا الیکشن نظر آرہا ہے، یہ چاہتے ہیں الیکشن نہ ہو، سینیٹ الیکشن میں کوئی جمہوری طریقہ نہ چلے، ان کو پتا ہے الیکشن میں پی ٹی آئی کو اکثریت مل جائے گی۔سینیٹ نے ہر حال میں چلنا ہے چاہتے عبوری حکومت ہی کیوں نہ آجائے۔الیکشن ایکٹ میں موجود ہے کہ 30دن پہلے یا 30دن بعد میں الیکشن کروا سکتے ہیں۔اسی طرح شو آف ہینڈ سے الیکشن ہوں گے جو بالکل شفاف ہوں گے۔ یہ دونوں باتیں کابینہ اجلاس میں زیربحث رہے ہیں۔اس موقع پر مسلم لیگ ن کے رہنماء مصدق ملک نے کہا کہ بہت دن پہلے کی بات ہے ایک جریدے میں بڑا مزاحیہ خاکہ تھا کہ کل رات کے جی بی کے دفتر پر ڈاکا پڑا اورآنے والے دس سال کے الیکشن رزلٹ چوری کرلیے گئے ہیں۔ابھی تو بڑی مہربانی وزیراعظم نے یہ نہیں کہہ دیا کہ الیکشن تو پچھلے سال ہوچکے ہیں۔سینیٹ میں نشستیں مارچ میں خالی ہوں گی ،لیکن یہ کیسے کروا سکتے ہیں۔ اگر کروا سکتے ہیں کہ تو اس کیلئے قانونی مشاورت کرنا ہوگی۔ آئینی ترمیم بھی کرنا پڑے گی۔پیپلزپارٹی کی رہنماء شہلا رضا نے کہا کہ دو دن ہوگئے پچاس پچاس ترجمان جلسے پر لگے ہوئے ہیں، ہزاروں سوشل میڈیا ورکرز وہاں لگے ہوئے ہیں۔ آج وزیرخارجہ بھی اتر آئے ہیں۔ جلسے سے کسی کو فرق پڑے یا نہ پڑے حکومت کو بڑا پڑ رہا ہے۔ لانگ مارچ بڑی شدت سے ہوگا، ملک میں اس وقت تشویش کی لہر ہے کہ ملک کو کس طرف دھکیلا جارہا ہے۔پی ڈی ایم اپنے فیصلوں سے پیچھے نہیں ہٹے گی۔ گیارہ جماعتوں کے درمیان چارٹرڈ سائن ہوا ہے۔
