لاہور (پی این آئی) گھی اور کوکنگ آئل کی قیمتوں میں نمایاں کمی ہو گئی، عالمی مارکیٹ میں خوردنی تیل کی قیمت میں زبردست کمی کی وجہ سے مقامی مارکیٹ میں گھی اور کوکنگ آئل کی قیمتوں میں مزید کمی ہونے کا امکان۔
تفصیلات کے مطابق پاکستان وناسپتی مینوفیکچررز ایسوسی ایشن کے سابق وائس چئیرمین عمر ریحان شیخ نے دعویٰ کیا ہے کہ گھی اور تیل کی قیمتوں میں 80 روپے تک کلو کمی ہوگئی ہے، اگر روپیہ مزید مضبوط ہوتا ہے تو گھی اور تیل کی قیمتوں میں نمایاں کمی ہوجائے گی۔عمر ریحان شیخ کے مطابق گزشتہ ماہ عالمی مارکیٹ میں خوردنی تیل کے نرخ960 ڈالر فی ٹن تھا۔ 110 ڈالر کمی کمی کے بعد 850 ڈالر فی ٹن ہو گیا، مقامی مارکیٹ میں38 روپے کم ہوئے اور روپے کی قدر میں اضافے سے 42 روپے کلو مزید کم ہوں گے۔پاکستان وناسپتی مینوفیکچررز ایسوسی ایشن کے سابق وائس چئیرمین نے کہا کہ ایکس مل پرائز گھی 360 روپے اور تیل 380 روپے فی کلو گرام ہو گیا ہے۔عمر ریحان شیخ نے کہا کہ پاکستان کی سالانہ کھپت 42 لاکھ ٹن ہے، پاکستان میں پام آئل کے ریکارڈ 5 لاکھ ٹن سے زائد اسٹاک موجود ہے۔ مہنگائی کی وجہ سے مارکیٹ میں ڈیمانڈ نہ ہونے کے برابر ہے، جبکہ عالمی مارکیٹ میں خوردنی تیل سستا ہونے اور ملک میں ڈالر بھی سستا ہونے سے گھی اور کوکنگ آئل مزید سستا ہوں گے۔
دوسری جانب نگران وزیراعظم انوارالحق کاکڑ نے ایکس پر اپنے بیان میں پیغام دیا کہ پٹرولیم مصنوعات کی قیمتوں میں خاطر خواہ کمی کی گئی ہے، پٹرولیم مصنوعات کی قیمتوں میں کمی کا فائدہ عوام کو منتقل ہونا چاہیے۔ وزرائے اعلیٰ ضروری اشیا کی قیمتوں کو کم کرنے کیلئے اقدامات کریں، نگران وزیراعظم نے وفاقی اور صوبائی حکام کو پرائس کنٹرول طریقہ کار فعال کرنے کی ہدایت بھی کی۔
