یکم جنوری سے یوٹیلیٹی سٹورز پر سستی اشاء کی فراہم، آٹا، چینی، گھی، چاول اور دالیں شامل

اسلام آباد(آئی این پی)وزیر اعظم شہباز شریف نے عوام کی مشکلات کے ازالہ کیلئے یوٹیلیٹی سٹورز کارپوریشن کے ذریعے وزیر اعظم ریلیف پیکج کے تحت بنیادی اشیا ضروریہ پر خصوصی ٹارگٹڈ سبسڈی یکم جنوری 2023 سے فراہم کر نے کی منظوری دیدی ہے۔ترجمان یوٹیلیٹی سٹورز کارپوریشن کی طرف سے ہفتہ کو جاری بیان کے مطابق سبسڈائزڈ اشیا ضروریہ میں آٹا، چینی، گھی، چاول اور دالیں شامل ہیں، بے نظیر انکم سپورٹ پروگرام کے تحت رجسٹرڈ صارفین جنکا سکور غربت انڈیکس میں 32 پی ایم ٹی کے برابر یا نیچے ہو گا ان کو آٹا، چینی، گھی، چاول اور دالوں پر خصوصی ٹارگٹڈ سبسڈی دی جائیگی۔

ان رجسٹرڈ صارفین کیلئے آٹا 10کلو بیگ 400 روپے، گھی 300 روپے فی کلو جبکہ چینی 70 روپے فی کلو کے حساب سے دستیاب ہوگی جبکہ چاول اور دالوں پر 15-20روپے فی کلو کی بچت ہوگی، ان صارفین کیلئے ماہانہ خریداری کی حد آٹا 40 کلو، چینی 5 کلو اور گھی 5 کلو مقرر کی گئی ہے، یوٹیلیٹی سٹورز کے دیگر صارفین کو بھی وزیر اعظم ریلیف پیکج کے تحت سبسڈی دی جائیگی۔عام صارفین کیلئے بھی آٹا، چینی،گھی، چاول اور دالوں پر سبسڈی دی جائیگی، ان تمام صارفین کو آٹا 10 کلو بیگ 648 روپے، گھی فی کلو 375 روپے اور چینی 89 روپے فی کلو، کے حساب سے فراہم کیا جائیگا جبکہ چاول اور دالوں پر 15-20 روپے فی کلو کی بچت ہو گی، ان صارفین کیلئے ماہانہ خریداری کی حد آٹا 20 کلو، چینی 3 کلو، گھی 3 کلو مقرر کی گئی ہے۔