اسلام آباد (پی این آئی)کرپشن کا ایک اور دروازہ کھل گیا، حکومت نے 25ہزار ٹن درآمد شدہ چینی سرکاری ادارے کے ذریعے فروخت کرنے کا فیصلہ کر لیا، وفاقی حکومت نے یوٹیلٹی اسٹورز کارپوریشن کو درآمد شدہ چینی دینے کا فیصلہ کرلیا۔ذرائع کے مطابق یوٹیلٹی اسٹورزپر چینی کی قلت کے باعث درآمدی چینی دینے کا
فیصلہ کیا گیا اور درآمدی چینی ٹریڈنگ کارپوریشن آف پاکستان (ٹی سی پی) کے ذریعے یوٹیلٹی اسٹورز کو دی جائے گئی۔ذرائع نے بتایا کہ یوٹیلٹی اسٹورز کو درآمد شدہ چینی میں سے 25 ہزارمیٹرک ٹن دی جائے گئی اور یہ چینی یوٹیلٹی اسٹورزکو 25 اکتوبرکو جاری کی جائے گی۔ذرائع وزرات صنعت وپیداوار کے مطابق بحری جہاز ٹی سی پی کی درآمدی چینی لے کر 22 اکتوبر کوپاکستان پہنچے گا۔ذرائع نے بتایا کہ یوٹیلٹی اسٹورز نے ستمبر میں چینی خریداری کا ٹینڈر دیا تھا مگر شوگر ملز نے حصہ نہیں لیا اور یہ کہہ کر انکار کیا کہ اُن کے پاس چینی نہیں۔خیال رہے کہ ملک بھر میں مہنگائی عروج پر ہے اور اشیائے ضروریہ کی قیمتیں آسمان پر پہنچ گئی ہیں جب کہ اس مہنگائی میں حکومت کے تمام تر دعوؤں کے باوجود یوٹیلٹی اسٹورز پر چینی، آٹا اور گھی دستیاب نہیں۔گزشتہ دنوں درآمدی چینی کیلئے یوٹیلٹی اسٹورز کارپوریشن نے وزارت صنعت و پیداوار کو خط لکھا تھا جس میں کہا گیا تھا کہ مقامی چینی مہنگی ہونے کے باعث درآمدی چینی لینا چاہتے ہیں، درآمدی چینی 6 سے 8 روپے فی کلو سستی ملنے کی توقع ہے۔
