15ہزار سے زائد اساتذہ کی ترقی کی راہ ہموار، صوبائی حکومت نے بڑی شرط ختم کردی

کراچی(آئی این پی) سندھ حکومت نے اساتذہ کی ترقی کیلئے بی ایڈ کی شرط ختم کردی، جس کے بعد 15ہزار سے زائداساتذہ کی ترقی کی راہ ہموار ہوگئی ہے۔تفصیلات کے مطابق سندھ حکومت نے صوبے بھر کے پرائمری اسکولوں کے اساتذہ کو ترقی دینے کا فیصلہ کرتے ہوئے ترقی کیلئے بی ایڈ کی شرط ختم کردی۔جس کے بعد 15ہزار سے زائد اساتذہ ترقی پاسکیں گے، 15 سال کی سروس مکمل کرنے والوں کو ترقی دی جائے گی اور جن اساتذہ کی سروس کو 9 سال ہوچکے ہیں انھیں گریڈ 15دیا جائے گا جبکہ 15سال مکمل کرنے والوں کوگریڈ 16دیا جائیگا،

گذشتہ سال اکتوبر میں سندھ کابینہ نے اساتذہ کے لیے بھرتی کی پالیسی میں نرمی کی تجویز کی منظوری دی تھی، جب صرف چند امیدواروں نے آی بی اے سکھر کی جانب سے 40,000 سے زائد آسامیوں کے لیے ٹیسٹ پاس کرنے میں کامیاب ہو پائے تھے۔اجلاس کو بتایا گیا کہ صوبے میں پرائمری اسکول ٹیچرز (PSTs) کے لیے 32،510 نشستوں کے مقابلے میں صرف 11،549 امیدواروں نے امتحان پاس کیا۔اسی طرح جونیئر ایلیمنٹری اسکول ٹیچرز (JESTs) کے ٹیسٹ میں 14,000 امیدواروں میں سے صرف 1،385 امیدوار کامیاب قرار پائے۔

اجلاس میں خواتین کے پاسنگ مارکس 55 فیصد سے کم کرکے 50 فیصد کرنے کی تجویز دی گئی جبکہ محکمہ تعلیم نے خصوصی امیدواروں کے پاسنگ کا معیار 55 فیصد سے کم کرکے 33 فیصد کرنے کی تجویز بھی دی تھی۔۔۔۔۔