جمعہ سے پیر کے دوران آندھی اور گرج چمک کے ساتھ بارش کی پیشگوئی

اسلام آباد(آئی این پی)محکمہ موسمیات نے کہاہے کہ جمعہ کے روز سے مرطوب ہوائیں بحیرہ عرب سے ملک کے شمال مشرقی علاقوں میں داخل ہونگی۔ جس کے باعث جمعہ سے پیر کے دوران آندھی اور گرج چمک کے ساتھ بارش کا امکان ہے۔محکمہ موسمیات کے مطابق جمعہ سے پیر کے دوران کشمیر، گلگت بلتستان، استور، کرمنگ،گانچھے ، شگر، اسلام آباد، راولپنڈی، مری، اٹک، چکوال، جہلم، گوجرانوالہ، گجرات، حافظ آباد، منڈی بہا الدین، نارووال، سیالکوٹ اور لاہور میں تیز بارشوں کا امکان ہے۔اس کے علاوہ قصور، مانسہرہ، ایبٹ آباد، ہری پور، نوشہرہ، پشاور، کوہاٹ، بنوں، ڈیرہ اسماعیل خان، مردان، بونیر، دیر، شانگلہ اور کوہستان میں آندھی اور گرج چمک جبکہ بعض مقامات پر موسلا دھار بارش کی پیشگوئی ہے۔ہفتہ سے اتوار کے دوران سرگودھا، بھکر، لیہ، خوشاب، میانوالی، فیصل آباد، جھنگ، ٹوبہ ٹیک سنگھ، ملتان، ساہیوال، ڈیرہ غازی خان، بہاولپور، بہاولنگر، بارکھان، موسی خیل اور ژوب میں بھی آندھی اور گرج چمک کے ساتھ بارش کا امکان ہے۔محکمہ موسمیات کے ماہرین کا کہنا ہے کہ بارش کے باعث حالیہ گرمی کی لہر میں کمی کا امکان ہے۔ تاہم ہفتہ اور اتوار کے روز آندھی اور تیز بارش کے باعث لاہور، گوجرانوالہ، سیالکوٹ، جہلم اور راولپنڈی میں نشیبی علاقے زیر آب آنے کا خدشہ ہے۔