متحدہ عرب امارات اور امریکی سینٹرل کمانڈ نے ٹاسک فورس ’ٹیلن سائنَیپس‘ کے قیام کا اعلان کیا ہے، جو دنیا کی پہلی دوطرفہ ٹاسک فورس ہے جس کا مقصد فوجی مصنوعی ذہانت (ملٹری اے آئی) کی ایپلی کیشنز کی ترقی کو تیز کرنا ہے۔
ابوظبی میں قائم ہونے والی اس ٹیم میں مصنوعی ذہانت، ڈیٹا اور سائبر سیکیورٹی کے شعبوں سے تعلق رکھنے والے 20 امریکی اور اماراتی ماہرین شامل ہوں گے۔ ٹاسک فورس کی توجہ انٹیلی جنس معاونت، اہم بنیادی ڈھانچے کے تحفظ اور علاقائی سلامتی کی نگرانی پر مرکوز ہوگی۔
نئی ٹاسک فورس اس بات کا اشارہ ہے کہ امریکا متحدہ عرب امارات کو فوجی اے آئی کے شعبے میں ایک قابلِ اعتماد شراکت دار سمجھتا ہے۔ یہ اقدام شیخ طحنون بن زاید النہیان اور امریکی سینٹرل کمانڈ کے ایڈمرل بریڈ کوپر کے درمیان ہونے والی اماراتی، امریکی گفتگو کے نتیجے میں تشکیل پایا ہے۔
امریکی سینٹرل کمانڈ نے 28 جولائی کو متحدہ عرب امارات کے ساتھ ایک معاہدے کا اعلان کیا تھا، جس کے تحت فوجی مصنوعی ذہانت کی ایپلی کیشنز کی ترقی کو تیز کرنے کے لیے پہلی دوطرفہ ٹاسک فورس قائم کی جائے گی۔
امریکا اور متحدہ عرب امارات کی اس ٹاسک فورس کا باقاعدہ آغاز آنے والے ہفتوں میں متوقع ہے۔ ابوظبی میں قائم ہونے والی اس ٹیم میں تقریباً 20 امریکی اور اماراتی اہلکار شامل ہوں گے، جنہیں مصنوعی ذہانت، ڈیٹا اور سائبر سیکیورٹی کے شعبوں میں مہارت حاصل ہوگی۔
سینٹرل کمانڈ کے ایڈمرل بریڈ کوپر نے کہا کہ یہ ایک تاریخی سنگ میل ہوگا، کیونکہ دونوں ممالک خطے کے باصلاحیت شراکت داروں میں سے ایک کے ساتھ مل کر مصنوعی ذہانت میں ہونے والی مسلسل پیش رفت کو تیزی سے جنگجو اہلکاروں تک پہنچانے کے لیے کام کر رہے ہیں۔
انہوں نے مزید کہا کہ امریکا اور اس کے اماراتی شراکت دار ایسی مصنوعی ذہانت کی ایپلی کیشنز اپنانے کے لیے مضبوط عزم رکھتے ہیں جو تیز رفتاری اور بڑے پیمانے پر جدت کو فروغ دیں گی۔
گزشتہ برس ایڈمرل بریڈ کوپر اور متحدہ عرب امارات کے قومی سلامتی کے مشیر شیخ طحنون بن زاید النہیان نے اس امکان پر گفتگو کی تھی کہ یہ ٹاسک فورس قائم کی جا سکتی ہے۔ گزشتہ ماہ خطے کے دورے کے دوران امریکی سینٹرل کمانڈ نے مصنوعی ذہانت کی صنعت کے رہنماؤں اور اماراتی دفاعی حکام سے بھی ملاقاتیں کی تھیں۔
ٹاسک فورس کی توجہ انٹیلی جنس معاونت کے لیے مصنوعی ذہانت کی ایپلی کیشنز کو مربوط کرنے، اہم بنیادی ڈھانچے کے تحفظ اور علاقائی سلامتی کے ماحول کی نگرانی پر مرکوز ہوگی۔
