کراچی(آئی این پی)کراچی کے علاقے گلستان جوہر میں اشارے پر نہ رکنے والے موٹر سائیکل سوار نوجوان کو پولیس اہلکاروں نے تعاقب کے بعد عمارت میں گھس کر فائرنگ کر کے قتل کردیا، ابتدائی تفتیش میں جرم ثابت ہونے پر تینوں اہلکاروں کو گرفتار کر لیا گیا ہے۔ڈپٹی انسپکٹر جنرل پولیس ایسٹ مقدس حیدر کے مطابق واقعہ کراچی ایسٹ کے شارع فیصل تھانے کی حدود گلستان جوہر میں پیش آیا۔
حکام کے مطابق موٹر سائیکل پر سوار دو افراد کو شاہین فورس کے اہلکاروں نے رکنے کا اشارہ کیا۔ وہ نہیں رکے تو موٹر سائیکل پر سوار ہو کر اہلکاروں نے ان کا تعاقب کیا اور ایک رہائشی عمارت کے احاطے میں جا کر ان پر فائرنگ کردی۔ جس سے عامر نامی نوجوان امارت کی سیڑھیوں پر چڑھتے ہوئے موقع پر جاں بحق ہوگیا۔ واقعہ کے بعد علاقے میں اشتعال پھیل گیا۔ڈی آئی جی ایسٹ مقدس حیدر کی ہدایت پر ایس ایس پی ایسٹ عبدالرحیم شیرازی کی نگرانی میں پولیس افسران نے ابتدائی تحقیقات کے دوران سی سی ٹی وی فوٹیج کی مدد سے ساری صورتحال واضح کی۔ایس ایس پی ایسٹ عبدالرحیم شیرازی کے مطابق موٹر سائیکل سوار دونوں افراد کے پاس سے اسلحہ برآمد نہیں ہوا۔انہوں نے بتایا کہ اس موٹر سائیکل پر دونوں افراد کے ہمراہ ایک چھوٹی بچی بھی تھی جو محفوظ رہی۔ڈی آئی جی ایس مقدس حیدر کے مطابق فائرنگ میں ملوث دونوں اہلکاروں کو گرفتار کر لیا گیا ہے۔ متوفی کے لواحقین سے رابطہ کرکے اہلکاروں کے خلاف قتل کا مقدمہ درج کیا جا رہا ہے۔۔۔۔
تازہ ترین خبروں کے لیے پی این آئی کا فیس بک پیج فالو کریں
