خیبرپختونخوا حکومت نے نیا ہیلی کاپٹر خریدنے کا فیصلہ کرلیا ہے۔ چیف سیکریٹری شہاب علی شاہ کے مطابق قدرتی آفات اور دیگر آپریشنز کیلئے ہیلی کاپٹر ناگزیر ہے، جبکہ مہمند میں ہیلی کاپٹر گرنے کے بعد حکومت کے پاس صرف ایک ہیلی کاپٹر رہ گیا ہے۔
واضح رہے کہ 15 اگست کو باجوڑ ریلیف آپریشن کے دوران سرکاری ہیلی کاپٹر حادثے کا شکار ہوا تھا۔ اس حادثے میں شہید ہونے والے عملے کے اہل خانہ کیلئے صوبائی کابینہ نے خصوصی پیکج کی منظوری دی ہے۔ ذرائع کے مطابق دونوں پائلٹس کے ورثاء کو اسکیل 19 پولیس افسر کے برابر شہداء پیکج دیا جائے گا، جس کے تحت کرنل (ر) شاہد سلطان اور آفتاب کے اہل خانہ کو 2، 2 کروڑ روپے دیے جائیں گے۔
فلائٹ انجینئر سلیم کے لواحقین کو ڈیڑھ کروڑ روپے جبکہ دو کریو چیفس کے ورثاء کو ایک، ایک کروڑ روپے دیے جائیں گے۔ وزیراعلیٰ علی امین گنڈاپور نے کہا کہ ہیلی کاپٹر عملے نے دوسروں کیلئے اپنی جانیں قربان کیں، یہ ہمارے اصل ہیرو ہیں اور ان کی قربانی سنہرے حروف میں لکھی جائے گی۔ انہوں نے یقین دہانی کرائی کہ صوبائی حکومت شہداء کے ورثاء کو خصوصی پیکج فراہم کرے گی اور انہیں تنہا نہیں چھوڑے گی۔
تازہ ترین خبروں کے لیے پی این آئی کا فیس بک پیج فالو کریں
