خیبر پختونخوا حکومت کو سرکاری ہیلی کاپٹر حادثے سے متعلق ابتدائی رپورٹ موصول ہوگئی ہے، جس میں بتایا گیا ہے کہ یہ حادثہ خراب موسم اور شدید دھند کے باعث پیش آیا۔
رپورٹ کے مطابق صوبائی حکومت کا ہیلی کاپٹر صبح 10 بج کر 30 منٹ پر باجوڑ کے علاقے سلار زئی کے لیے روانہ ہوا اور امدادی کارروائیوں سے واپسی پر ضلع مہمند میں حادثے کا شکار ہوگیا۔ تحقیقات میں بتایا گیا کہ ہیلی کاپٹر کو تلاش کرنے کے لیے ڈرون کیمروں کا استعمال کیا گیا اور حادثے کی تصدیق شام 4 بج کر 45 منٹ پر ہوئی۔ حادثے میں 5 افراد شہید ہوئے، جن میں پائلٹ شاہد سلطان اور ریٹائرڈ ونگ کمانڈر آفتاب بھی شامل ہیں۔ شہدا کی لاشیں ہیلی کاپٹر کے ذریعے پشاور منتقل کردی گئیں۔
حکام کا کہنا ہے کہ حادثے کے وقت علاقے میں بارش نہیں ہورہی تھی تاہم جس مقام پر حادثہ ہوا وہاں پہاڑ بادلوں اور گھنی دھند میں ڈوبا ہوا تھا اور ہیلی کاپٹر کا ملبہ ایک خشک نالے میں گرا۔ دوسری جانب کلاؤڈ برسٹ، لینڈ سلائیڈنگ اور سیلابی ریلوں کے باعث خیبر پختونخوا، گلگت بلتستان اور آزاد کشمیر کے مختلف علاقوں میں بڑے پیمانے پر تباہی ہوئی ہے اور مختلف حادثات میں 250 سے زائد افراد جاں بحق ہوچکے ہیں۔
تازہ ترین خبروں کے لیے پی این آئی کا فیس بک پیج فالو کریں
