پشاور: محکمہ داخلہ خیبرپختونخوا نے چہلم حضرت امام حسینؓ کے موقع پر امن و امان کی صورتحال کے پیش نظر صوبے کے 13 اضلاع میں ڈبل سواری اور اجتماعات پر پابندی عائد کردی۔ یہ اضلاع پشاور، نوشہرہ، مردان، ایبٹ آباد، مانسہرہ، ہری پور، کوہاٹ، ہنگو، بنوں، کرم، لکی مروت، ڈیرہ اسماعیل خان اور ٹانک شامل ہیں۔
محکمہ داخلہ کے مطابق دفعہ 144 کے تحت لگائی گئی یہ پابندی ایک ہفتے تک نافذ رہے گی۔ اس دوران وال چاکنگ، اشتعال انگیز تقاریر، قابل اعتراض مواد کی تشہیر، لاؤڈ اسپیکر کے استعمال اور گاڑیوں کے کالے شیشوں پر بھی پابندی ہوگی۔ مزید برآں، اسلحے کی نمائش، ہوائی فائرنگ، آتش بازی اور چہلم کے جلوسوں کی گزرگاہوں کے قریب گھروں کی چھتوں پر عوام کی موجودگی بھی ممنوع قرار دی گئی ہے، جبکہ افغان شہریوں کی نقل و حرکت پر بھی پابندی عائد کی گئی ہے۔
تازہ ترین خبروں کے لیے پی این آئی کا فیس بک پیج فالو کریں
