راولپنڈی اور اسلام آباد میں ہونے والی تیز بارش کے باعث نشیبی علاقے زیر آب آگئے، مختلف علاقوں میں گھروں اور سڑکوں پر پانی داخل ہوگیا ہے۔
راولپنڈی کی نجی ہاؤسنگ سوسائٹی فیز 8 اور ملحقہ دیہات میں بھی بارش کا پانی داخل ہوگیا، جن میں باغ راجگان، کھڑکن اور سوہاوہ کے دیہات شامل ہیں۔ پانی گھروں میں داخل ہونے سے مقامی افراد کو شدید مشکلات کا سامنا ہے۔ ٹریفک پولیس کے مطابق اڈیالہ سرکل اور بسکٹ فیکٹری چوک پر پانی جمع ہونے سے ٹریفک کی روانی متاثر ہوئی ہے۔ خواجہ کارپوریشن جانے والی سڑک پر بھی پانی کھڑا ہے جبکہ سول لائنز سرکل اور یونیورسٹی چوک پر ٹریفک سست روی کا شکار ہے۔ شہریوں کو گاڑی احتیاط سے چلانے کی ہدایت جاری کی گئی ہے۔
ادھر ایم ڈی واسا سلیم اشرف نے بتایا ہے کہ راولپنڈی میں رین ایمرجنسی نافذ کردی گئی ہے اور واسا کا عملہ ہائی الرٹ پر ہے۔ شہر کی مجموعی صورتحال کنٹرول میں ہے اور کسی خطرے کی بات نہیں۔ واسا عملے کی تمام چھٹیاں منسوخ کردی گئی ہیں جبکہ ہیوی مشینری اور اضافی عملہ نشیبی علاقوں میں تعینات کر دیا گیا ہے۔ محکمہ موسمیات نے مزید بارشوں کی پیشگوئی کی ہے جس کے پیش نظر تمام انتظامات مکمل کرلیے گئے ہیں۔ شہر میں دفعہ 144 نافذ ہے اور ندی نالوں میں نہانے پر پابندی عائد کی گئی ہے۔ نالہ لئی کی مسلسل نگرانی کی جا رہی ہے، جہاں کٹاریاں کے مقام پر پانی کی سطح 6 فٹ اور گوالمنڈی پر 5 فٹ ریکارڈ کی گئی ہے۔
شہریوں سے اپیل کی گئی ہے کہ وہ بارش کے دوران برساتی نالوں سے دور رہیں۔
مختلف علاقوں میں بارش کی مقدار:
سید پور: 40 ملی میٹر
گولڑہ: 15 ملی میٹر
شمس آباد: 15 ملی میٹر
کچہری: 28 ملی میٹر
تازہ ترین خبروں کے لیے پی این آئی کا فیس بک پیج فالو کریں
