شمال مشرقی بلوچستان میں موسلادھار بارشوں کے باعث ندی نالوں اور نشیبی علاقوں میں سیلابی کیفیت پیدا ہوگئی ہے۔ کوہ سلیمان رینج اور مشرقی بالائی علاقوں کے برساتی نالے شدید بارشوں کے بعد طغیانی کا شکار ہیں۔
سیلابی ریلوں کے باعث بلوچستان کو پنجاب اور خیبرپختونخوا سے ملانے والی کئی اہم شاہراہیں متاثر ہو گئی ہیں، جن میں ہرنائی، دُکی، موسیٰ خیل اور کوہلو کو ملانے والی سڑکیں شامل ہیں۔ دوسری جانب پنجاب کے مختلف علاقوں، خصوصاً لاہور میں وقفے وقفے سے بارش کا سلسلہ جاری ہے۔ کمالیہ میں دریائے راوی پر واقع جھلا رسگھلا کے مقام پر زمینی کٹاؤ سے سینکڑوں ایکڑ زرعی اراضی دریا برد ہو چکی ہے، جس سے مکئی، چاول اور سبزیوں کی فصلوں کو شدید نقصان پہنچا ہے۔
محکمہ موسمیات نے آئندہ دنوں میں جنوبی پنجاب، شمال مشرقی بلوچستان، کشمیر اور خیبرپختونخوا میں تیز ہواؤں اور گرج چمک کے ساتھ چند مقامات پر مزید بارش کی پیشگوئی کی ہے، جبکہ ملک کے دیگر علاقوں میں موسم گرم اور شدید حبس برقرار رہنے کا امکان ہے۔
تازہ ترین خبروں کے لیے پی این آئی کا فیس بک پیج فالو کریں
