رمضان المبارک میں اسکولز صبح کتنے بجے کھلیں گے؟ اہم خبر آگئی

رمضان المبارک میں اسکولوں کے اوقات کار میں تبدیلی کی تیاری کر لی گئی ہے، جبکہ متوقع ہے کہ پاکستان میں رمضان 18 یا 19 فروری سے شروع ہوگا۔

تفصیلات کے مطابق پنجاب کے اسکول ایجوکیشن ڈپارٹمنٹ نے اعلان کیا ہے کہ رمضان المبارک 2026 کے دوران تعلیمی اداروں کے اوقات کار میں تبدیلی کی جائے گی۔ یہ اقدام روزے کے دوران طلبہ، اساتذہ اور دیگر عملے کو سہولت فراہم کرنے کے لیے کیا جا رہا ہے۔

متوقع ہے کہ رمضان 2026 پاکستان میں 18 یا 19 فروری سے شروع ہوگا، جس کا حتمی فیصلہ چاند کی رویت کے بعد کیا جائے گا۔

ریگولر اسکولوں میں پیر سے جمعرات تک اوقات کار صبح 8:30 بجے سے دوپہر 1:00 بجے تک جبکہ جمعہ کے روز صبح 8:30 بجے سے دوپہر 12:30 بجے تک متوقع ہیں۔

ڈبل شفٹ والے اسکولوں میں پہلی شفٹ کے اوقات صبح 8:30 بجے سے 12:30 بجے تک ہوں گے جبکہ دوسری شفٹ دوپہر 1:00 بجے سے شام 4:00 بجے تک جاری رہے گی، تاہم جمعہ کے روز دوسری شفٹ کے اوقات دوپہر 2:30 بجے سے شام 5:00 بجے تک ہوں گے۔

فی الوقت اسکولوں کے اوقات کار صبح 8:45 بجے سے دوپہر 1:30 بجے تک ہیں اور یہ شیڈول 15 اپریل تک نافذ العمل رہے گا۔

والدین کی جانب سے حالیہ دنوں میں دیر سے شروع ہونے والے اسکول اوقات پر تحفظات کا اظہار کیا گیا ہے اور حکومت سے مطالبہ کیا گیا ہے کہ اسکولوں کے اوقات میں فوری رد و بدل کیا جائے، بالخصوص اس صورتحال میں جب اسموگ کے اثرات کم ہو چکے ہیں۔

تاہم اسکول ایجوکیشن ڈپارٹمنٹ کی جانب سے اس حوالے سے تاحال کوئی نئی حکمت عملی نافذ نہیں کی گئی۔