فیسوں میں اضافہ ، طالبعلموں کیلئے پریشان کن خبر

تعلیمی بورڈ راولپنڈی نے فیسوں میں اضافہ کر دیا ہے۔ بورڈ نے امتحانات کے لیے سی سی ٹی وی کیمرہ فیس 30 روپے عائد کی ہے جبکہ ہر طالب علم پر 900 روپے گمنام متفرق فیس کے علاوہ سند فیس 550 روپے سے بڑھا کر 1,000 روپے کر دی گئی ہے۔

طلبہ پر 350 روپے ڈویلپمنٹ چارجز اور 300 روپے پوسٹل خرچ بھی عائد کیا گیا ہے۔ اس کے علاوہ سکالرشپ فیس بھی 250 روپے مقرر کی گئی ہے۔

ایجوکیشن بورڈ راولپنڈی نے ان فیسوں کا سرکلر جاری کیا ہے، جس کے مطابق پروسیسنگ فیس 450 روپے سے بڑھا کر 1,000 روپے کر دی گئی ہے۔ رجسٹریشن فیس 1,000 روپے، داخلہ فیس 1,000 روپے، ایڈمشن فیس ریگولر آرٹس 1,700 روپے، سائنس گروپ 1,740 روپے، جبکہ پرائیویٹ طلبہ کے لیے ایڈمشن فیس آرٹس 1,800 روپے اور سائنس گروپ 1,900 روپے مقرر کی گئی ہے۔

انٹرمیڈیٹ ریگولر طلبہ کی مجموعی فیس 7,730 روپے جبکہ پرائیویٹ طالب علم کی مجموعی فیس 7,570 روپے رکھی گئی ہے۔

واضح رہے کہ میٹرک کے سالانہ امتحانات 27 مارچ اور انٹرمیڈیٹ کے امتحانات 20 مئی سے شروع ہوں گے۔ ٹرپل فیس کے ساتھ داخلہ بھجوانے کی آخری تاریخ 9 مارچ مقرر کی گئی ہے۔

دوسری طرف آل پاکستان پرائیویٹ سکولز ایسوسی ایشن نے فیسوں میں اضافہ اور نئے ٹیکس کو مسترد کر دیا ہے۔