پنجاب حکومت نے صوبے میں ٹیکس نظام کو ہم آہنگ اور مؤثر بنانے کے لیے اہم قدم اٹھاتے ہوئے مختلف محکموں کے درمیان ٹیکس کوآرڈینیشن بہتر بنانے کا فیصلہ کیا ہے، اور اس سلسلے میں لینڈ ٹیکسز فورم کے قیام کی باضابطہ تجویز پیش کی گئی ہے۔
حکومتی ذرائع کے مطابق یہ نیا فورم وزیرِاعلیٰ کمیٹی آن ریسورس موبلائزیشن کے ماتحت کام کرے گا، جبکہ اس میں بورڈ آف ریونیو کے سینیئر ممبر سمیت فنانس، ایکسائز اینڈ ٹیکسیشن، آبپاشی اور لوکل گورنمنٹ کے نمائندے شامل ہوں گے۔
اس سے قبل پنجاب میں ٹیکس پالیسی سازی اور مربوط حکمت عملی کے لیے کوئی مشترکہ پلیٹ فارم موجود نہیں تھا، جس کے باعث محکموں کے درمیان بے ربطی، دہرے کام اور کمزور رابطہ ٹیکس نظام کو متاثر کر رہا تھا۔ ڈیٹا کے غیر مؤثر استعمال کے سبب صوبائی ریونیو کو بھی نقصان پہنچتا رہا ہے۔
حکام کا کہنا ہے کہ لینڈ ٹیکسز فورم کے قیام کے بعد محکموں کے درمیان ڈیٹا شیئرنگ، نگرانی اور پالیسی ہم آہنگی بہتر ہو گی، جبکہ ٹیکس دہندگان کو سہولت ملے گی اور کمپلائنس میں بھی بہتری آئے گی۔
مزید بتایا گیا ہے کہ اس فورم کے ذریعے ٹیکس انتظامی اصلاحات کی رفتار تیز ہو گی اور صوبے میں ٹیکس سے متعلق ریونیو میں نمایاں اضافہ متوقع ہے۔
تازہ ترین خبروں کے لیے پی این آئی کا فیس بک پیج فالو کریں
