**جیکو نے پاکستان کی سب سے سستی ہائبرڈ ایس یو وی ‘جے 5’ لانچ کردی**
پاکستان میں ہائبرڈ گاڑیوں کی بڑھتی ہوئی مانگ کے پیش نظر جیکو نے نشاط گروپ کے اشتراک سے اپنی سب سے سستی ہائبرڈ ایس یو وی جیکو جے 5 لانچ کر دی ہے۔
کمپنی کے مطابق یہ گاڑی سیڈان اور ایس یو وی کے درمیان قیمت کے فرق کو کم کرنے کی کوشش ہے، جس میں جدید ٹیکنالوجی، بہتر فیول ایوریج اور پریمیم سہولیات نسبتاً مناسب قیمت پر فراہم کی گئی ہیں۔
جیکو جے 5 ایک سیلف چارجنگ ہائبرڈ ایس یو وی ہے، جس میں 1.5 لیٹر ٹربو پیٹرول انجن کو 1.83 کلو واٹ آور بیٹری کے ساتھ جوڑا گیا ہے۔ کمپنی اس ٹیکنالوجی کو “سپر ہائبرڈ سسٹم” کا نام دیتی ہے، جو چیری کی جانب سے تیار کیا گیا ہے۔ یہ گاڑی دو ویرینٹس، کمفرٹ اور پریمیم میں دستیاب ہے۔
ڈیزائن کے لحاظ سے جیکو جے 5 کا فرنٹ ڈیزائن روور ایوک جیسا دکھائی دیتا ہے۔ واٹر فال اسٹائل فرنٹ گرل، ایل ای ڈی ہیڈلائٹس، 18 انچ الائے ویلز، روف ریلز، چھپے ہوئے ڈور ہینڈلز اور جدید بمپر اسے مہنگی ایس یو ویز جیسی روڈ پریزنس فراہم کرتے ہیں۔ گاڑی میں مناسب بوٹ اسپیس موجود ہے، تاہم اسپیئر وہیل کی جگہ ٹائر ریپئر کٹ دی گئی ہے۔ پریمیم ویرینٹ میں پاورڈ ٹیل گیٹ اور 60:40 اسپلٹ ریئر سیٹس بھی شامل ہیں۔
اندرونی حصے میں ڈوئل ٹون گرے کلر اسکیم، سوفٹ ٹچ میٹیریل اور کاربن فائبر طرز کی ٹرم استعمال کی گئی ہے۔ کیبن میں 36 رنگوں کی ایمبینٹ لائٹنگ اور جدید ڈیش بورڈ ڈیزائن موجود ہے، جو گاڑی کو کشادہ احساس دیتا ہے۔
ٹیکنالوجی کے حوالے سے جیکو جے 5 میں 13.2 انچ ٹچ اسکرین انفوٹینمنٹ سسٹم دیا گیا ہے، جس کے ذریعے ڈرائیونگ موڈز اور ہائبرڈ انرجی یوز سمیت مختلف سیٹنگز کنٹرول کی جا سکتی ہیں۔ اس کے علاوہ وائرلیس ایپل کار پلے، اینڈرائیڈ آٹو اور 8 انچ ڈیجیٹل انسٹرومنٹ کلسٹر بھی شامل ہے۔
سیفٹی فیچرز میں 6 ایئر بیگز، 540 ڈگری کیمرا سسٹم، فرنٹ کولیژن وارننگ، ایمرجنسی بریکنگ، ایڈاپٹو کروز کنٹرول، لین ڈیپارچر وارننگ، بلائنڈ اسپاٹ مانیٹرنگ، ریئر کراس ٹریفک الرٹ اور ڈرائیور فیٹیگ مانیٹرنگ شامل ہیں، جو اسے اپنی کلاس میں نمایاں بناتے ہیں۔
کارکردگی کے لحاظ سے گاڑی 221 ہارس پاور اور 295 نیوٹن میٹر ٹارک پیدا کرتی ہے۔ کمپنی کے مطابق اس کی فیول ایوریج تقریباً 18 کلومیٹر فی لیٹر ہے، جبکہ 51 لیٹر کے فیول ٹینک کے ساتھ ایک بار فل ہونے پر 950 کلومیٹر تک سفر ممکن ہو سکتا ہے۔
قیمت کے حوالے سے جیکو جے 5 کو پاکستان کی سب سے سستی ہائبرڈ ایس یو وی قرار دیا جا رہا ہے۔ کمفرٹ ویرینٹ کی قیمت 66 لاکھ 99 ہزار روپے جبکہ پریمیم ویرینٹ کی قیمت 76 لاکھ 99 ہزار روپے مقرر کی گئی ہے۔
کمپنی کے مطابق یہ تعارفی قیمتیں 10 مارچ 2026 تک برقرار رہیں گی۔ خریداروں کے لیے بینک کے ذریعے فنانسنگ کی سہولت بھی فراہم کی گئی ہے، جس کے تحت ماہانہ اقساط ایک لاکھ 6 ہزار 542 روپے سے شروع ہوتی ہیں۔
ماہرین کے مطابق جیکو جے 5 ان خریداروں کے لیے ایک مضبوط آپشن بن کر سامنے آئی ہے، جو سیڈان سے اپ گریڈ ہو کر ایس یو وی خریدنا چاہتے ہیں، تاہم فیول ایوریج اور آرام پر سمجھوتہ نہیں کرنا چاہتے۔
تازہ ترین خبروں کے لیے پی این آئی کا فیس بک پیج فالو کریں
