پی ٹی اے نے پی ٹی سی ایل کو ٹیلی نار کے حصول کے لیے این او سی جاری کر دیا ہے۔
پاکستان ٹیلی کمیونی کیشن اتھارٹی (پی ٹی اے) نے پاکستان ٹیلی کمیونی کیشن کمپنی لمیٹڈ (پی ٹی سی ایل) کو ٹیلی نار پاکستان پرائیویٹ لمیٹڈ کے حصول کے لیے این او سی جاری کیا ہے۔ یہ منظوری قابل اطلاق ریگولیٹری فریم ورک کے تحت کی جانے والی جامع جانچ پڑتال کے بعد دی گئی۔
پی ٹی اے کے بیان کے مطابق مجوزہ ٹرانزیکشن کا مارکیٹ میں مسابقت، صارفین کے تحفظ اور ٹیلی کام شعبے پر مجموعی اثرات کا تفصیلی جائزہ لیا گیا۔ اس دوران قواعد و ضوابط کی مکمل پاسداری کو یقینی بنانے کے لیے متعلقہ سرکاری اداروں سے مشاورت بھی کی گئی۔
این او سی کے اجرا کے بعد پی ٹی سی ایل کو قانونی اور تجارتی تقاضوں کی تکمیل کے ساتھ حصول کے آئندہ مراحل پر پیش رفت کی اجازت دی گئی ہے۔ دونوں کمپنیاں منتقلی کے دوران خدمات کی بلا تعطل فراہمی، معیارِ خدمات (QoS) اور لائسنس کی تمام شرائط کی مکمل پابندی یقینی بنائیں گی۔
پی ٹی اے اس پورے عمل کی نگرانی کرے گا تاکہ صارفین کے حقوق کا مؤثر تحفظ یقینی بنایا جا سکے اور ملک میں ایک مسابقتی، مستحکم اور مستقبل کے تقاضوں سے ہم آہنگ ٹیلی کام سیکٹر کے فروغ کو یقینی بنایا جا سکے۔
تازہ ترین خبروں کے لیے پی این آئی کا فیس بک پیج فالو کریں
