تحریک انصاف ہماری جماعت ہے،ہم پارٹی میں ہیں اور رہیں گے، جہانگیر ترین کا حیرت انگیز اعلان

لاہور (پی این آئی) تحریک انصاف کے رہنما جہانگیر ترین کی عبوری ضمانت میں لاہور کی مقامی عدالت نے 22 اپریل تک جبکہ بینکنگ کورٹ سے ان کی ضمانت میں 17 تک توسیع کر دی ہے۔شوگر ملز اکاؤنٹس اور منی لانڈرنگ کیس میں جہانگیر ترین کی عدالت میں پیشی کے موقع پر ان کے ہمراہ تحریک انصاف کے متعدد ارکان قومی و صوبائی اسمبلی بھی تھے۔ اس موقع پرمیڈیا سے گفتگو کرتے ہوئے جہانگیر ترین نے کہا کہ ان کے

خلاف ایف آئی اے کی تفتیش آزادانہ اور غیر جانبدارانہ نہیں اور اس کو فون کال پر کنٹرول کیا جا رہا ہے۔ انکوائری ضرور کریں لیکن شفاف تحقیقاتی ٹیم بنائیں جو متنازع نہ ہو۔جہانگیر ترین نے کہا کہ وہ قانون کی گرفت سے بھاگ رہے ہیں اور نہ بھاگیں گے،تحریک انصاف ہماری جماعت ہے۔ ہم پارٹی میں ہیں اور رہیں گے۔ تحریک انصاف کے رکن قومی اسمبلی راجہ ریاض نے کہا کہ ہمارے کپتان عمران ہیں اور ہم ان سے مطالبہ کرتے ہیں کہ ان کے اردگرد جو لوگ ہیں ان سے بچیں وہ پارٹی کو نقصان پہنچا رہے ہیں۔راجہ ریاض نے کہا کہ جہانگیر ترین پارٹی کا قیمتی ترین اثاثہ ہیں، ان پر جھوٹے مقدمات بنائے گئے ہیں۔ہم بلیک میلر نہیں ہمدرد لوگ ہیں۔ خان صاحب غصہ نہ کریں۔ راجہ ریاض کا کہنا تھا کہ پارٹی کے اندر کچھ لوگ عمران خان اور تحریک انصاف کے خلاف سازش کر رہے ہیں۔۔۔۔۔

ڈسکہ حلقہ میں 21 فیصد کورونا پھیل چکا ،ڈاکٹر فردوس عاشق اعوان نے الیکشن کمیشن کو چیلنج دے دیا

لاہور (آن لائن)معاون خصوصی برائے اطلاعات وزیراعلی پنجاب ڈاکٹر فردوس عاشق اعوان نے کہا ہے کہ اشیائے خورونوش کی قیمتوں میں کمی کیلئے پنجاب حکومت نے پلان مرتب کر لیا ہے۔سینئر وزیر عبدالعلیم خان کے ہمراہ ڈی جی پی آر میں میڈیا سے گفتگو کرتے ہوئے ڈاکٹر فردوس عاشق اعوان کا کہنا تھا کہ وزیراعظم عمران نے اپنے ایک روزہ دورہ لاہور میں عوامی مفادات پر مبنی منصوبوں کے بارے بریفنگ لی ۔وزیراعظم نے مہنگائی کو کنٹرول کرنے کیلئے پنجاب حکومت کی ترجیحات کا تفصیل سے جائزہ لیا اور مثبت تجاویز دیں۔وزیراعظم عمران خان نے پنجاب حکومت کے عوام دوست اقدامات کو سراہا۔ڈاکٹر فردوس عاشق اعوان نے بتایا کہ صوبائی وزیر خوراک اور چیف سیکرٹری نے وزیراعظم کو صوبے میں اشیائے خورونوش کی ڈیمانڈ اور سپلائی کے حوالے سے بریفنگ دی۔انہوں نے کہا کہ گندم,آٹا,چینی,دالیں اور سبزیوں کی قیمتوں میں کمی حکومتی ترجیحات کا حصہ ہے۔معاون خصوصی نے بتایا کہ وزیراعظم عمران خان اور وزیراعلی پنجاب سردار عثمان بزدار کی زیر قیادت جنوبی پنجاب کے حوالے سے بڑے فیصلے کیے گئے جو وزیر خزانہ پنجاب ہاشم جواں بخت جلد قوم کے سامنے رکھیں گے۔ ڈاکٹر فردوس عاشق اعوان نے ڈسکہ الیکشن کے حوالے سے ایک سوال کا جواب دیتے ہوئے کہا کہ ڈسکہ حلقہ میں 21 فیصد کورونا پھیل چکا ہے،کورونا ایس او پیز پر عملدرآمد کرتے ہوئے انتخاب کا انعقاد ممکن بنانا الیکشن کمیشن کا امتحان ہے۔پنجاب حکومت نے الیکشن کمیشن کے ضابطہ اخلاق پر عملدرآمد ممکن بنایا,شفاف انتخاب کیلئے پاک فوج اور رینجرز کی خدمات بھی لی گئی ہیں۔ڈاکٹر فردوس عاشق اعوان کا کہنا تھا کہ ن لیگی امیدوار کا رونا دھونا سمجھ سے بالاتر ہے۔پنجاب حکومت ہرطرح کی سہولت کاری کر رہی ہے اب ہم لوگوں سے زبردستی ووٹ تو ن لیگ کیلئے نہیں ڈلوا سکتے۔ن لیگی امیدوار نے فائرنگ اور مختلف حیلے بہانوں سے رونے دھونے کا سلسلہ شروع کر رکھا ہے۔حلقہ کی عوام فیصلہ کرے گی کہ پی ٹی آئی کا امیدوار ان کیلئے 1 ارب کا ترقیاتی پیکج علاقے کیلئے لیکر آئے گا دوسری طرف ن لیگی امیدوار جانشینی،گدی نشینی اور منشیات فروشی کا تحفہ دے گا۔ڈاکٹر فردوس عاشق اعوان نے کہا کہ ڈسکہ کی عوام باشعور ہے وہ سوچ سمجھ کر ووٹ کا فیصلہ کریں گے اور اپنا ووٹ پی ٹی آئی کے امیدوار کے پلڑے میں ڈالیں گے۔اس موقع پر سینئر وزیر خوراک عبدالعلیم خان کا کہنا تھا کہ وزیر اعظم عمران خان کی ہدایات کے مطابق پنجاب میں رمضان پیکج کی تیاری کر لی ہے۔ کل سے صوبے بھر میں گندم خریداری کے مراکز پر کام شروع ہو رہا ہے۔عبدالعلیم خان نے کہا کہ کسانوں کو 400روپے فی من اضافے کے ساتھ 1800روپے کی ریکارڈ قیمت دینگے۔ وزیر اعظم عمران خان اشیائے خورونوش کی قیمتوں کے جائزے کیلئے ہر ہفتے اجلاس طلب کرتے ہیں۔ پنجاب میں سارا سال آٹے کا تھیلا 860روپے میں دستیاب رہا ہے۔سینئر وزیر نے کہا کہ رمضان بازاروں میں 10کلو آٹے کا تھیلا375روپے کے رعائتی نرخوں پر دستیاب ہوگا۔ رمضان بازاروں میں آٹے و چینی کے علاوہ دالوں، سبزیوں اور دیگر اشیاء پر بھی 25فیصد تک رعائیت ہوگی۔رمضان بازاروں کو بعد میں سہولت بازاروں میں تبدیل کر دینگے، سبسڈی جاری رہے گی۔ رمضان میں 20روپے کی رعائیت کے ساتھ چینی 65 روپے فی کلو میں دستیاب ہوگی۔پنجاب میں آٹے کا تھیلا 860روپے کا تھا وہی سندھ میں 1200سے1400روپے تک فروخت ہوا۔ سندھ حکومت پنجاب کی طرح کاشتکاروں کیلئے سبسڈی کا فیصلہ کرے۔عبدالعلیم خان نے کہا کہ پنجاب سندھ اور کے پی کے میں گندم و آٹے کی قیمت یکساں ہونی چاہیے۔۔۔۔۔۔۔