وزیراعلی خیبر پختونخوا تو میرے بغیر ہل نہیں سکتے، جو میں کہتا ہوں وزیراعلی وہی کرتا ہے، میرے سامنے کوئی گاؤں کے خلاف بات کرے گا تو میں اس کے منہ پر تھپڑ ماروں گا، پرویز خٹک کا نوشہرہ میں خطاب

نوشہرہ (این این آئی)وزیر دفاع پرویز خٹک کی ایک ویڈیو وائرل ہوگئی جس میں وہ کہتے دکھائی دے رہے ہیں کہ وزیراعلی خیبر پختونخوا محمود خان تو ان کے بغیر ہل نہیں سکتے۔نوشہرہ میں 29 اگست کو ہونے والے جلسے کی وائرل ہونے والی ویڈیو میں پرویز خٹک نے کہا کہ فنڈز کا غلط استعمال کرنے والے کرپٹ

عناصر کے خلاف تحقیقات کریں گے، یہاں پر جو کتے ہیں ان سب کو یہاں سے بھگائیں گے اور صحیح لوگ لے کر آئیں گے۔سابق وزیراعلی خیبرپختونخوا نے کہاکہ صوبے کا وزیراعلی میرے بغیر ہل نہیں سکتا جو میں کہتا ہوں وزیراعلی وہی کرتا ہے۔انہوںنے کہاکہ وہ اپنے حلقے کے ہر خاندان کو جا نتے ہیں کہ کون صحیح اور کون غلط ہے، ان کے سامنے گائوں کے خلاف کوئی بات کرے گا اس کے منہ پر تھپڑ ماریں گے، ان کا بھائی اور بھتیجا بھی ان کے بغیر ایک قدم آگے نہیں جاسکتے۔ وائرل ویڈیو کے حوالے سے اپنا ردعمل دیتے ہوئے پرویز خٹک نے کہاکہ سوشل میڈیا پر وائرل ویڈیو کارکنوں کے ساتھ غیر رسمی اجلاس تھا، تحریک انصاف نے ہمیشہ کرپشن کے خلاف جہاد کیا ہے۔پرویز خٹک کا کہنا تھا کہ ان کے حلقے میں تین پارٹی کارکنوں پرکرپشن ثابت ہوئی جس پر ان کو پارٹی سے نکال دیا ہے، انہوں نے اپنے دورحکومت میں ارکان اسمبلی کو بھی کرپشن کے الزام پر پارٹی سے نکالا ہے ۔پرویز خٹک نے کہا کہ وزیر اعلی محمود خان صوبے کے چیف ایگزیکٹو اور میرے دوست ہیں،وزیراعلی ہمارے ساتھ مشاورت سے کام کررہے ہیں۔