لاہور میں پنجاب حکومت نے تعلیمی شعبے میں ایک اہم پیش رفت کرتے ہوئے پانچویں اور آٹھویں جماعت کے امتحانات کو سرکاری طور پر منعقد کرنے کی منظوری دے دی ہے۔
یہ فیصلہ وزیراعلیٰ پنجاب مریم نواز کی زیر صدارت ہونے والے صوبائی کابینہ کے 28ویں اجلاس میں کیا گیا، جس میں 130 نکات پر مشتمل ایک جامع ایجنڈا منظور کیا گیا۔ اجلاس میں تعلیم، صحت، عوامی فلاح، سرمایہ کاری، فلڈ ریلیف، سیفٹی اور گورننس سے متعلق کئی اہم فیصلے کیے گئے۔
تعلیمی حوالے سے کابینہ نے طے کیا کہ پانچویں جماعت کے طلبہ کا جائزہ لیا جائے گا، جبکہ آٹھویں جماعت کے طلبہ کا باقاعدہ امتحان لیا جائے گا، تاکہ اسکولوں کی کارکردگی، طلبہ کی تعلیمی سطح اور معیارِ تعلیم کا درست اندازہ لگایا جا سکے۔ حکام کے مطابق اس اقدام کا مقصد تعلیمی نظام میں شفافیت لانا اور تعلیمی اداروں کی کارکردگی کو بہتر بنانا ہے۔
اس کے علاوہ کابینہ نے سرکاری و نجی جامعات میں خزانچی، رجسٹرار اور کنٹرولر امتحانات کی تقرری کے لیے یکساں طریقہ کار اپنانے کا بھی فیصلہ کیا ہے۔
اجلاس میں پنجاب ایکوپیشنل سیفٹی اینڈ ہیلتھ رولز 2024 اور پنجاب ریسٹرکشن آن ایمپلائمنٹ آف چلڈرن رولز 2024 کی منظوری دی گئی۔ وزیراعلیٰ نے مزدوروں کے تحفظ کو یقینی بنانے کے لیے لیبر ڈیپارٹمنٹ کو انفورسمنٹ فورس بنانے کی ہدایت بھی جاری کی۔
تازہ ترین خبروں کے لیے پی این آئی کا فیس بک پیج فالو کریں
