مارکیٹیں، شاپنگ مالز کتنے بجے بند ہوں گے؟ حکومت کا بڑا فیصلہ

حکومت نے پنجاب، اسلام  آباد، خیبرپختونخوامیں مارکیٹس رات 8 بجے بند کرنے کا فیصلہ کیا ہے۔

وزیراعظم شہبازشریف کی زیرصدارت پیٹرولیم مصنوعات، توانائی بچت اور کفایت شعاری سے متعلق اجلاس میں اہم فیصلے کیے گئے ہیں۔

بلوچستان، جی بی میں بھی بازار، مارکیٹس، شاپنگ مالز رات 8 بجے بند کرنے کا فیصلہ کیا گیا ہے جب کہ آزاد کشمیر میں بازار، مارکیٹس، شاپنگ مالز رات 8 بجے بند ہوں گی۔

خیبر پختونخوا کے ڈویژنل ہیڈکوارٹرز میں مارکیٹس رات 9 بجے تک کھلنےکی اجازت ہو گی، اجلاس میں ہونے والا فیصلہ صوبائی حکومت کی مشاورت سے کیا گیا ہے۔

روزمرہ اشیاکی دکانیں، ڈیپارٹمنٹل اسٹورز، مالز بھی رات 8 بجے بندہوں گے تاہم بیکریاں، ریسٹورنٹ تندور،کھانے پینے کی دیگر دکانیں رات 10بجے بند ہوں گی۔

میرج ہالز، مارکیز و دیگر شادیوں کی کمرشل جگہیں رات 10 بجے بند ہو گی اور ساتھ ہی نجی پراپرٹیز اور گھروں میں بھی شادی تقریبات کی رات 10 بجے کے بعد پابندی ہو گی۔

میڈیکل اسٹورز ،فارمیسیز کے اوقات کار پابندیوں سے مستثنیٰ ہوں گے۔ اجلاس میں کئےگئے فیصلوں کا اطلاق7 اپریل سے ہو گا۔

سندھ میں مارکیٹیں اور شاپنگ مالز کی بندش سے متعلق مشاورت کا عمل جاری ہے جس کے بعد نئے کاروباری اوقات کار کا اعلان کیا جائے گا۔