ملک میں آج ڈالر اور دیگر کرنسیوں کی قیمت کیا ؟ جانئے

پاکستان میں منگل کے روز انٹر بینک مارکیٹ میں پاکستانی روپے میں معمولی بہتری دیکھی گئی، جس کے نتیجے میں امریکی ڈالر کی قدر 279.15 روپے پر ریکارڈ کی گئی۔

اسٹیٹ بینک آف پاکستان کی رپورٹ کے مطابق امریکی ڈالر کی یہ نئی قیمت گزشتہ روز کے مقابلے میں ایک پیسہ کم ہے اور رواں سال 2026 کی کم ترین سطح ہے۔

امریکی ڈالر مارکیٹ ذرائع کے مطابق اکتوبر سے جاری ریٹ 279 سے 282 روپے کی حد میں کاروبار ہو رہا تھا۔ برآمد کنندگان ڈالر کو 279.60 سے اوپر فروخت کر رہے ہیں جبکہ پیٹرولیم درآمد کنندگان اسے 279.10 سے کم سطح پر خرید رہے ہیں۔

برطانوی پاؤنڈ کی قیمت کم ہو کر 368.75 روپے ہو گئی، جو گزشتہ روز 369.64 روپے تھی۔ ماہرین کا کہنا ہے کہ ٹیکسٹائل برآمد کنندگان تقریباً چھ ماہ کے لیے تقریباً 370 روپے کی سطح پر ہیجنگ یعنی نقصان سے تحفظ کے اقدامات کر رہے ہیں۔

خلیجی کرنسیوں کی بات کی جائے تو سعودی ریال 74.40 روپے، یو اے ای درہم 76.01 روپے اور قطری ریال 76.59 روپے پر ٹریڈ ہوئے۔ ایکسچینج کمپنیوں کے مطابق عمرہ سیزن سے قبل زائرین کی جانب سے ریال کی طلب میں اضافہ دیکھا جا رہا ہے۔

دیگر اہم کرنسیاں کویتی دینار 909.42 روپے، آسٹریلوی ڈالر 191.40 روپے اور کینیڈین ڈالر 200.23 روپے پر ریکارڈ کی گئیں۔ یورو 320.13 روپے، جاپانی ین 1.75 روپے، سوئس فرانک 348.99 روپے جبکہ چینی یوآن 40.41 روپے پر برقرار رہا۔

ماہرین کے مطابق زرمبادلہ مارکیٹ میں استحکام برقرار ہے اور شرح تبادلہ بنیادی معاشی عوامل کے بجائے تکنیکی بنیادوں پر حرکت کر رہی ہے۔ پاکستان کے زرِمبادلہ ذخائر 21.26 ارب ڈالر تک پہنچ گئے ہیں، جبکہ حقیقی مؤثر شرح تبادلہ 98.2 کی سطح پر ہے، جسے آئی ایم ایف کے مطابق مسابقتی قرار دیا گیا ہے۔

ماہرین کا کہنا ہے کہ اگر تیل کی قیمتیں 90 ڈالر فی بیرل سے اوپر نہ گئیں اور سیاسی صورتحال مستحکم رہی تو 2026 کی پہلی سہ ماہی میں ڈالر 278 سے 282 روپے کے درمیان رہنے کا امکان ہے۔