سندھڑی کے قریب گزشتہ روز پُراسرار آتشزدگی میں حاملہ عورت اور اس کے 2کم عمر بیٹوں کی ہلاکت کے واقعے نے نیا رخ اختیار کرلیا۔
تعلقہ سندھڑی کے گوٹھ ولی محمد منگریو میں7 ماہ کی حاملہ خاتون مریم بھیل، اس کے دو بیٹے 2 سالہ خوشحال اور5 سالہ ہرلال کے گزشتہ روز گھر میں جل کر جاں بحق ہونے والے واقعے کی دلخراش تفصیلات سامنے آئی ہیں۔ سندھڑی پولیس کے مطابق ابتدائی تفتیش سے معلوم ہوا کہ مذکورہ خاندان گندم کی کٹائی کی مزدوری کرنے تھر سے آیا تھا، ملزم کو اپنی بیوی کے کردار پر شک تھا جس کی وجہ سے ان کے درمیان اکثر تنازع رہتا تھا۔
پولیس کا بتانا ہے کہ ملزم گزشتہ روز اپنی بیوی بچوں کو کسی بہانے کھیت سے گھر لے گیا اور ہاتھ پاؤں باندھ کر گھر کو آگ لگاکر فرار ہوگیا جس سے ان کی بیوی اور دو بچے جھلس کر خاکستر ہوگئے۔ قتل کا انکشاف اس وقت ہوا جب مقتولہ کے رشتہ داروں نے میڈیا اور پولیس ملاقات کے دوران ملزم پر شک ظاہر کیا جس کے بعد پولیس نے بیوی اور بیٹوں کے مبینہ قتل کے الزام میں ملزم ویجھو بھیل کو گرفتار کرلیا۔ابتدائی پوسٹ مارٹم رپورٹ میں بھی تشدد کی تصدیق ہوئی جبکہ پولیس کا بتانا ہے کہ ملزم نے اعتراف جرم بھی کرلیا ہے۔
تازہ ترین خبروں کے لیے پی این آئی کا فیس بک پیج فالو کریں
