ایرانی وزیر خارجہ حسین امیر عبدالہیان پاکستان پہنچ گئے، ایجنڈا کیا ہے؟

اسلام آباد(آئی این پی)ترجمان دفتر خارجہ نے کہا ہے کہ ایران کے وزیر خارجہ حسین امیر عبدالہیان 2 روزہ دورے پر اسلام آباد پہنچ گئے ہیں۔ترجمان دفتر خارجہ کے مطابق وزیر خارجہ عبدالہیان(آج)جمعرات کو اپنے پاکستانی ہم منصب بلاول بھٹو زرداری سے ملاقات کریں گے، وسیع ایجنڈے میں دوطرفہ تعلقات کے تمام پہلوں اور ابھرتی ہوئی علاقائی صورتحال پر بات چیت شامل ہے۔

وزیر خارجہ عبدالہیان پاکستان کے وزیر اعظم شہباز شریف سے بھی ملاقات کریں گے، ایرانی وزیر خارجہ تعلقات کو آگے بڑھانے کے لیے دونوں ممالک کی قیادت کے درمیان اتفاق رائے پر تبادلہ خیال کریں گے۔ترجمان دفتر خارجہ کا کہنا تھا کہ ایرانی وزیر خارجہ سپیکر قومی اسمبلی اور چیئرمین سینیٹ سے بھی ملاقات کریں گے، فریقین دونوں برادر ممالک کے درمیان پارلیمانی روابط پر تبادلہ خیال کریں گے۔ایرانی وزیر خارجہ عبدالہیان کا دورہ دونوں فریقین کے لیے دوطرفہ تعلقات کے تمام پہلوں پر بات چیت کرنے کا ایک موقع ہو گا، اس دورے میں خاص طور پر علاقائی روابط، توانائی اور پاکستان اور ایران کے درمیان اقتصادی و سرمایہ کاری کے تعلقات پر بات چیت کی جائے گی۔