مون سون بارشیں، تعلیمی اداروں میں چھٹیاں بڑھا دی گئیں

دہلی (پی این آئی)بھارت میں مون سون بارشوں نے جہاں شمالی ریاستوں میں تباہی مچارکھی ہے وہیں بھارتی دارالحکومت نئی دہلی بھی بارشوں اور سیلابی صورتحال سے بری طرح متاثر ہے۔

بھارتی میڈیا کے مطابق مون سون کی بارشوں کے باعث نئی دہلی کی جمنا ندی میں پانی کی سطح خطرناک حد سے بھی تجاوز کرگئی اور دریا میں پانی کی مزید سطح میں اضافے کا امکان بھی ظاہر کیا گیا ہے۔مسلسل بارشوں اور پانی کی آمد کی وجہ سے 2روز نئی دہلی کی جمنا ندی نے 45 سالہ ریکارڈ توڑا تھا جہاں پانی کی سطح 207.08 میٹر تک ریکارڈ کی گئی تھی تاہم اب بتایا جارہا ہے کہ گزشتہ روز صبح پانی کی سطح خطرناک حد سے بھی تجاوز کرتے ہوئے 208.46 میٹر تک پہنچ گئی ہے۔بھارتی میڈیا کے مطابق نئی دہلی میں شدید بارشوں کے باعث متعدد علاقے زیر آب ہیں جبکہ ہریانہ کے ہتھنی بیراج کنڈ سے پانی چھوڑے جانا سیلابی صورتحال کی بنیادی وجہ بتائی گئی ہے تاہم ماہرین کا کہنا ہے کہ دہلی کو درپیش مسئلے کی کئی اور وجوہات بھی ہیں۔نئی دہلی کے وزیر اعلیٰ کی جانب سے ہریانہ کو دریا میں پانی چھوڑنے سے منع کیا گیا تھا تاہم ریاست ہریانہ کی جانب سے دریا میں مزید پانی چھوڑ ا گیا ہے جس کی وجہ سے دریا میں پانی خطرناک لیول سے3 میٹر تک اوپر جاچکا ہے۔

بھارتی میڈیا کے مطابق شہر میں سیلابی صورتحال کی وجہ سے پینے کے پانی کے پلانٹ بند ہونے سے پانی کی بھی قلت ہوگئی ہے، شہر کی سڑکیں تالاب کا منظر پیش کررہی ہیں جہاں گاڑیاں بھی پانی میں ڈوبی ہوئی ہیں۔دہلی حکومت نے ہنگامی صورتحال پر تمام سکول سمیت سرکاری اور نیم سرکاری اداروں کو بھی بند رکھنے کی ہدایت کی ہے جبکہ ریسکیو اہلکار شہریوں کو محفوظ مقامات پر منتقل کررہے ہیں۔