انٹیلی جنس بیورو کی ایک سالہ کارکردگی رپورٹ سامنے آ گئی

اسلام آباد (آئی این پی)وزیراعظم شہبازشریف کو انٹیلی جنس بیورو کی ایک سال کی کارکردگی رپورٹ پیش کردی گئی، آئی بی کے ڈائریکٹر جنرل فواد اسداللہ خان نے رپورٹ وزیراعظم کو پیش کی،وزیراعظم نے انٹیلی جنس بیورو کی ایک سال کی کارکردگی پر اطمینان کا اظہار کرتے ہوئے کہا کہ پاکستان کی سلامتی، خودمختاری، ملکی اور غیرملکی عناصر سے خطرات کے مقابلے میں آئی بی کا کردار قابل تحسین ہے،شہباز شریف نے کہا کہ قومی سلامتی اور خودمختاری کے تحفظ میں آئی بی نے اہم کردار ادا کیا ہے،

وزیراعظم بننے کے بعد آئی بی کو قومی مفادات کے حوالے سے اضافی ٹاسک سونپے جو اس نے کامیابی سے حاصل کئے، ملک کے اندر مجرمانہ سرگرمیوں کے تدارک، انسداد دہشت گردی میں آئی بی نے فعال کردار ادا کیا،انہوں نے کہا کہ بروقت اطلاعات کی فراہمی سے درست فیصلہ سازی میں بھی آئی بی کا شاندار کردار رہا، وزیراعظم نے فواد اسداللہ کی پیشہ وارانہ قابلیت اور ادارے کو بہتر بنانے کی کاوشوں کی سراہا، انہوں نے کہا کہ ادارے کی غیرمعمولی کامیابیاں قابل فخر ہیں،وزیراعظم نے آئی بی کے افسران اور عملے کو شاباش دی، انہوں نے آئی بی کے شہدا کو بھی خراج عقیدت پیش کیا، انہوں نے کہا کہ مادر وطن کے تحفظ اور سلامتی کے لئے جام شہادت نوش کرنے والے شہدا پر قوم کو فخر ہے،فواد اسداللہ خان نے وزیراعظم کے آئی بی میں اعتماد اور بھرپور حمایت پر شکریہ اداکیا، انہوں نے کہا کہ آئی بی ملک کی سب سے پرانی اور بڑی سویلین انٹیلی جنس ایجنسی ہے۔