الیکشن کمیشن آف پاکستان نے اراکین پارلیمنٹ اور صوبائی اسمبلیوں کو آگاہ کیا ہے کہ مالی سال 2024-25 کے اثاثوں اور واجبات کے گوشوارے جمع کروانے کی حتمی تاریخ 31 دسمبر 2025 ہے۔
الیکشن ایکٹ 2017 کی دفعہ 137 کے تحت تمام اراکین کو اپنے، اہلِ خانہ اور زیر کفالت بچوں کے اثاثوں کی تفصیلات مقررہ فارم-بی پر سالانہ جمع کروانا لازمی ہے۔
کمیشن نے واضح کیا ہے کہ جو اراکین مقررہ تاریخ تک گوشوارے جمع نہیں کروائیں گے، ان کے نام یکم جنوری 2026 کو پریس ریلیز کے ذریعے شائع کیے جائیں گے۔ 15 جنوری تک گوشوارے جمع نہ کرانے والے اراکین کی رکنیت 16 جنوری کو معطل کر دی جائے گی۔
کمیشن نے یہ بھی بتایا کہ اگر گوشواروں میں غلط یا گمراہ کن معلومات فراہم کی جاتی ہیں تو جمع کروانے کی تاریخ سے 120 دن کے اندر قانونی کارروائی کی جائے گی۔
فارم-بی اور متعلقہ ہدایات الیکشن کمیشن سیکرٹریٹ اسلام آباد، صوبائی دفاتر، سینیٹ سیکرٹریٹ اور قومی و صوبائی اسمبلیوں کے سیکرٹریٹس سے مفت حاصل کی جا سکتی ہیں، جبکہ یہ فارم کمیشن کی ویب سائٹ پر بھی دستیاب ہے۔ کمیشن نے تمام اراکین پر زور دیا ہے کہ وہ قانونی پیچیدگیوں سے بچنے کے لیے وقت پر اپنے گوشوارے جمع کروائیں۔
تازہ ترین خبروں کے لیے پی این آئی کا فیس بک پیج فالو کریں
