بھارت ہائبرڈ جنگ کے ذریعے شکست کا بدلہ لے رہا ہے، فیلڈ مارشل عاصم منیر

فیلڈ مارشل سید عاصم منیر نے کہا ہے کہ بھارت معرکہ حق میں اپنی شکست کا بدلہ دہشت گرد گروہوں کے ذریعے ہائبرڈ جنگ سے لینے کی ناکام کوشش کر رہا ہے۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے نیشنل ورکشاپ بلوچستان کے 16ویں سیشن میں شریک سول سرونٹس اور ماہرین تعلیم سے ملاقات کی، جہاں انہوں نے قومی سلامتی اور علاقائی چیلنجز پر گفتگو کی۔ انہوں نے بھارت کی جانب سے دہشت گرد عناصر کی سرپرستی کی شدید مذمت کرتے ہوئے کہا کہ بھارت معرکہ حق میں ذلت آمیز شکست سے دوچار ہو چکا ہے اور اب دہشت گرد گروہوں کے ذریعے پاکستان کے خلاف ہائبرڈ جنگ کو ہوا دے رہا ہے۔ انہوں نے کہا کہ ایسے گروہوں کا انجام بھی بھارت جیسا ہی ہو گا۔

فیلڈ مارشل کا کہنا تھا کہ بھارت کی جانب سے دہشت گردوں کی پشت پناہی بلوچستان کے عوام کی حب الوطنی کو کمزور کرنے کی ایک ناکام کوشش ہے۔ انہوں نے واضح کیا کہ پاکستان کو درپیش اندرونی یا بیرونی خطرات کی صورت میں قومی وقار اور عوام کی سلامتی کے تحفظ کے لیے ہر ممکن قدم اٹھایا جائے گا۔ انہوں نے زور دے کر کہا کہ دہشت گردی نہ مذہب، نہ فرقہ، اور نہ نسل دیکھتی ہے، اس کے خاتمے کے لیے قومی سطح پر اجتماعی عزم اور اتحاد ناگزیر ہے۔

فیلڈ مارشل عاصم منیر نے بلوچستان میں جاری ترقیاتی منصوبوں کی اہمیت کو اجاگر کرتے ہوئے تمام اداروں کے درمیان باہمی تعاون اور مربوط قومی حکمت عملی اپنانے پر بھی زور دیا۔ آئی ایس پی آر کے مطابق سیشن کے اختتام پر شرکاء اور فیلڈ مارشل کے درمیان ایک مثبت اور بامعنی مکالمہ بھی ہوا۔