وزیراعظم لیپ ٹاپ اسکیم کیلئے 16 ارب 80 کروڑ منظور، کس کس کو دیئے جائیں گے؟

اسلام آباد(آئی این پی)قومی اقتصادی کونسل کی ایگزیکٹیو کمیٹی (ایکنک)کے اجلاس میں وزیراعظم لیپ ٹاپ اسکیم کیلیے 16 ارب 80 کروڑ روپے کی منظوری دے دی گئی۔اسلام آباد میں وزیر خزانہ سینیٹر اسحاق ڈار کی زیر صدارت اجلاس ہوا، جس میں کئی بڑے منصوبوں کی منظوری دی گئی۔اجلاس کے اعلامیے کے مطابق وزیر اعظم لیپ ٹاپ اسکیم کیلیے 16 ارب 80 کروڑ روپے کی منظوری دی گئی، یہ اسکیم مرکزی حکومت کی فنانسنگ سے 2 سال میں مکمل ہوگی۔

ایکنک اجلاس میں محکمہ موسمیات کا نظام جدید بنانے کے 14 ارب 49 کروڑ 88 لاکھ روپے کے منصوبے کی منظوری دی گئی۔اعلامیے کے مطابق اجلاس میں جامشورو اور ٹھٹھہ میں پانی فراہمی کے 39 ارب 94 کروڑ روپے کے منصوبے منظور کیے گئے۔ایکنک اجلاس میں لاہور رنگ روڈ جنوبی کو 17 ارب 78 کروڑ روپے سے مکمل کرنے کی منظوری دی گئی۔اعلامیے کے مطابق اجلاس میں صوبوں میں زرعی ٹیوب ویلز سولر پر منتقل کرنے کے منصوبوں کو بھی منظور کیا گیا۔ایکنک اجلاس میں خوازہ خیلہ سے بشام تک 48 کلو میٹر طویل شاہراہ کی تعمیر کی منظوری دی گئی، جس پر 79 ارب 13 کروڑ روپے کی لاگت آئے گی۔اجلاس کے اعلامیے کے مطابق اس دوران پاکستان ایجوکیشن منصوبے کو 14 ارب روپے مالیت سے مکمل کرنے کی بھی منظوری دی گئی۔اعلامیے کے مطابق پاکستان ایجوکیشن منصوبے کے تحت ملک بھر میں تعلیمی وظائف دیے جائیں گے۔اجلاس میں لاہور ساہیوال بہاولنگر موٹر کا پہلا حصہ 263 ارب 79 کروڑ روپے سے مکمل کرنے کی منظوری دی گئی، 295 کلو میٹر سڑک بہاولپور، قصور، اوکاڑہ، پاکپتن، ساہیوال اور لاہور کے درمیان بنے گی۔۔۔۔