بیجنگ (پی این آئی) وزیر اعظم عمران خان نے امریکہ اور چین کے درمیان تنازعہ حل کرانے کے لیے کردار ادا کرنے کی پیش کش کر دی ہے۔اس حوالے سے وزیرِ اطلاعات فواد چوہدری کا کہنا ہے کہ بیجنگ میں وزیراعظم عمران خان کی تھنک ٹینکس سے ملاقات ہوئی، وزیراعظم نے زور دیا کہ دنیا ایک اورسردجنگ کی متحمل نہیں ہوسکتی، امریکا اور چین کے درمیان تنازعہ حل کرنے میں پاکستان کردار ادا کرنے کو تیار ہے۔
فواد چوہدری نے وزیراعظم کے دورہ چین سے متعلق گفتگو میں بتایا کہ عمران خان سےچین میں سرمایہ کاروں کی ملاقاتیں ہوئیں، کراچی اور فیصل آباد میں پانی کے منصوبوں سے متعلق گفتگو ہوئی، کراچی میں کےفور منصوبہ، حب کینال جبکہ فیصل آباد میں واٹر ٹریٹمنٹ پلانٹ کے حوالے سے بات ہوئی۔انہوں نے کہا کہ وزیراعظم آج چینی صدر کے سربراہان مملکت کے اعزاز میں دیئے گئے ظہرانے میں شرکت کریں گے،
وزیراعظم کی آج شام اقوام متحدہ کے سیکرٹری جنرل، ازبکستان کے صدر اورچین کے وزیراعظم سے ملاقات ہوگی۔وفاقی وزیر نے بتایا کہ وزیراعظم کی کل چین کے صدر سے ون آن ون ملاقات ہوگی۔فواد چوہدری نے کہا کہ چین کے سرمائی اولمپکس میں پاکستان کی ٹیم پہلی مرتبہ شریک ہوئی، پاکستان کی ٹیم کا چین کے عوام کی جانب سے والہانہ خیرمقدم کیا گیا، پاک چین دوستی دونوں ملکوں کے عوام کی ایک دوسرے کیلئے محبت کے اظہار پر ہے۔وفاقی وزیر نے کہا کہ چینی سرمایہ کار پاکستان میں سرمایہ کاری میں دلچسپی کا اظہار کر رہے ہیں۔۔۔۔۔
تازہ ترین خبروں کے لیے پی این آئی کا فیس بک پیج فالو کریں
