فروری میں پاکستان میں کورونا کی پانچویں لہر کا خدشہ، روزانہ کتنے ہزار کیس سامنے آ سکتے ہیں؟

اسلام آباد (پی این آئی) ماہرین نے خدشہ ظاہر کیا ہے کہ فروری 2022ء میں پاکستان میں کورونا وباء کی پانچویں لہر آ سکتی ہے۔ صحت کے شعبے سے وابستہ ماہرین نے پاکستان میں کورونا وائرس کی جنوبی افریقی قسم اومی کرون کے 75 کیسز سامنے آنے پر کورونا کی وبا کی پانچویں لہر کے خدشات ظاہر کیے ہیں۔ ماہرینِ صحت کے مطابق کورونا وائرس کے 3 سے 4 ہزار نئے کیسز یومیہ سامنے آ سکتے ہیں۔ میڈیا رپورٹس کے مطابق وزارتِ صحت کے حکام کا کہنا ہے کہ اومی کرون کے کیسز جس تیزی سے سامنے آ رہے ہیں اس سے ظاہر ہوتا ہے کہ اگلے 2 ہفتے میں ملک بھر سے اومی کرون کے کیسز رپورٹ ہونے لگیں گے۔

اس طرح اگلے برس فروری کے وسط میں کورونا کے 3 سے 4 ہزار نئے کیسز یومیہ سامنے آ سکتے ہیں۔ تاہم حکام نے واضح کیا ہے کہ ویکسین لگوانے والے اومی کرون کے باعث شدید بیماری سے محفوظ رہ سکتے ہیں۔ اسلام آباد میں قومی ادارۂ صحت کے مطابق پاکستان میں بھی سامنے آنے والے اومی کرون کے 75 کیسز میں سے 33 کیسز کراچی، 17 اسلام آباد، 13 لاہور اور 12 بیرونِ ملک سے آنے والے مسافروں سے رپورٹ ہوئے ہیں۔۔۔۔