سابق بھارتی کپتان روہت شرما نے پاکستان کے خلاف اہم مقابلے سے پہلے اپنی ٹیم کو محتاط رہنے کا مشورہ دے دیا۔
ایک تقریب کے دوران جب اُن سے پوچھا گیا کہ ٹی 20 کرکٹ میں کامیابی کتنی مشکل ہو چکی ہے اور کیا صرف فیورٹ قرار دیے جانے سے جیت یقینی بن سکتی ہے، تو روہت شرما نے واضح انداز میں جواب دیا کہ وہ کبھی بھی “فیورٹ” کے تصور پر یقین نہیں رکھتے۔ اُن کا کہنا تھا کہ ٹی 20 ایک غیر متوقع فارمیٹ ہے جہاں چند اوورز میں میچ کا نقشہ بدل سکتا ہے۔ گزشتہ برسوں میں بین الاقوامی کرکٹ نے بارہا ثابت کیا ہے کہ کوئی بھی ٹیم کسی کو بھی شکست دے سکتی ہے۔
روہت شرما نے زور دیا کہ جدید دور میں تمام ٹیموں کے پاس ٹی 20 کھیلنے کا وسیع تجربہ موجود ہے، اس لیے میدان میں اترتے وقت یہ سوچنا کہ دو پوائنٹس آسانی سے مل جائیں گے، بڑی غلطی ہو سکتی ہے۔ کامیابی کے لیے میچ کے ہر لمحے میں معیاری کرکٹ کھیلنا ضروری ہے، ورنہ نتیجہ مایوس کن بھی ہو سکتا ہے۔ انہوں نے مزید کہا کہ ماضی کی فتوحات یا ناکامیوں کو پسِ پشت ڈال کر موجودہ صورتِ حال، کھلاڑیوں کی فارم اور حکمتِ عملی پر توجہ دینا ہی دانشمندی ہے۔ ٹورنامنٹ میں شامل ہر ٹیم جیت کی صلاحیت رکھتی ہے، اس لیے کسی کو کمزور سمجھنا خطرناک ثابت ہو سکتا ہے۔
واضح رہے کہ پاکستان اور بھارت کے درمیان میچ اتوار کو کولمبو میں شیڈول ہے، جبکہ بھارتی ٹیم آج رات دہلی سے کولمبو روانہ ہوگی۔
تازہ ترین خبروں کے لیے پی این آئی کا فیس بک پیج فالو کریں
