ورلڈکپ، ٹیم کا اعلان کر دیا گیا

پاکستان کرکٹ بورڈ نے تین ملکی سیریز اور آئی سی سی انڈر 19 ورلڈ کپ کے لیے قومی انڈر 19 ٹیم کا اعلان کر دیا ہے۔

فرحان یوسف بدستور پاکستان انڈر 19 ٹیم کی قیادت کریں گے، جبکہ اسکواڈ میں صرف ایک تبدیلی کی گئی ہے۔ محمد حذیفہ کی جگہ عمر زیب کو ٹیم میں شامل کر لیا گیا ہے۔ اعلان کردہ اسکواڈ کے مطابق فرحان یوسف (کپتان)، عثمان خان (نائب کپتان)، عبدالسبحان، احمد حسین، علی حسن بلوچ، علی رضا، دانیال علی خان اور عمر زیب ٹیم کا حصہ ہوں گے۔
اس کے علاوہ حمزہ ظہور، حذیفہ احسن، مومن قمر، محمد صیّام، محمد شایان، نقاب شفیق اور سمیر منہاس بھی قومی انڈر 19 اسکواڈ میں شامل ہیں۔

تین ملکی سیریز 25 دسمبر سے 6 جنوری تک زمبابوے میں کھیلی جائے گی، جس میں پاکستان، افغانستان اور میزبان زمبابوے کی ٹیمیں حصہ لیں گی۔ پاکستان انڈر 19 ٹیم اس سیریز میں کم از کم چار میچز کھیلے گی۔ دوسری جانب آئی سی سی انڈر 19 ورلڈ کپ 15 جنوری سے 6 فروری تک نمیبیا اور زمبابوے میں منعقد ہوگا۔ دونوں ٹورنامنٹس 50 اوور فارمیٹ میں کھیلے جائیں گے، جہاں نوجوان کھلاڑی اپنی صلاحیتوں کے جوہر دکھاتے نظر آئیں گے۔