آئی سی سی ٹی ٹوئنٹی ورلڈ کپ 2026 کے گروپس اور پاک–بھارت میچ سے متعلق اہم تفصیلات منظرِ عام پر آگئی ہیں۔
یہ میگا ایونٹ 7 فروری سے 8 مارچ تک جاری رہے گا، جب کہ مکمل شیڈول 25 نومبر کو جاری کیا جائے گا۔ میڈیا رپورٹس کے مطابق ورلڈ کپ میں 20 ٹیموں کو چار گروپس میں تقسیم کیا جائے گا، ہر گروپ میں پانچ ٹیمیں شامل ہوں گی۔ ہر گروپ سے دو سرفہرست ٹیمیں سپر 8 مرحلے میں پہنچیں گی۔ پاکستان اور بھارت کی ٹیموں کو ایک ہی گروپ میں رکھا جانے کا امکان ہے، اور دونوں روایتی حریفوں کے درمیان ہائی وولٹیج مقابلہ 15 فروری کو کولمبو میں طے کیا گیا ہے۔ اس گروپ میں نیدرلینڈز، نمیبیا اور امریکا کی ٹیموں کے شامل ہونے کا امکان بھی ظاہر کیا جا رہا ہے۔
مشترکہ میزبان سری لنکا کے گروپ میں آسٹریلیا، زمبابوے، آئر لینڈ اور عمان شامل ہوں گے۔ دیگر دو ممکنہ گروپس میں انگلینڈ، ویسٹ انڈیز، بنگلادیش، نیپال اور اٹلی ایک ساتھ ہوں گے، جب کہ جنوبی افریقہ، نیوزی لینڈ، افغانستان، یو اے ای اور کینیڈا ایک اور گروپ میں شامل کیے جانے کا امکان ہے۔ بھارت میں میچز ممبئی، کولکتہ، چنئی، دہلی اور احمد آباد میں کھیلے جائیں گے، جب کہ سری لنکا میں کولمبو اور کینڈی میزبان ہوں گے۔ پاکستان اپنی تمام گروپ اسٹیج کی میزبانی سری لنکا میں کرے گا۔
ٹورنامنٹ کے فائنل کے لیے احمد آباد کو منتخب کیا گیا ہے، تاہم اگر پاکستان فائنل میں پہنچتا ہے تو فیصلہ کن معرکہ کولمبو منتقل کر دیا جائے گا۔ سیمی فائنلز کے لیے ممبئی اور کولکتہ کو تجویز کیا گیا ہے، البتہ سیمی فائنلسٹ ٹیموں کے مطابق وینیوز میں تبدیلی ممکن ہے۔ پاکستان کے سیمی فائنل میں پہنچنے کی صورت میں یہ میچ بھی سری لنکا میں ہی کھیلا جائے گا۔
تازہ ترین خبروں کے لیے پی این آئی کا فیس بک پیج فالو کریں
