پاکستان اور بھارت کی ایمرجنگ کرکٹ ٹیمیں ایک بار پھر آمنے سامنے آنے کو تیار ہیں۔
رپورٹس کے مطابق آئندہ ماہ دوحہ میں ایشیا کپ رائزنگ اسٹارز 2025 منعقد ہوگا، جہاں ایشیائی ممالک کے باصلاحیت نوجوان کرکٹرز ٹی ٹوئنٹی فارمیٹ میں اپنی مہارت کا مظاہرہ کریں گے۔ ایشین کرکٹ کونسل (اے سی سی) نے ایمرجنگ ایشیا کپ کا نام تبدیل کر کے ایشیا کپ رائزنگ اسٹارز رکھ دیا ہے۔ یہ ایونٹ 14 سے 23 نومبر تک جاری رہے گا، جس میں مجموعی طور پر 15 میچز کھیلے جائیں گے۔
ایونٹ میں وہی آٹھ ٹیمیں حصہ لیں گی جو گزشتہ ماہ امارات میں ہونے والے ایشیا کپ میں شریک تھیں، جن میں پاکستان، بھارت، افغانستان، سری لنکا، بنگلادیش، عمان، متحدہ عرب امارات اور ہانگ کانگ شامل ہیں۔ گروپنگ کے مطابق اے گروپ میں بنگلادیش اے، افغانستان اے، سری لنکا اے اور ہانگ کانگ شامل ہیں، جبکہ بی گروپ میں پاکستان اے، بھارت اے، عمان اور متحدہ عرب امارات کو رکھا گیا ہے۔
پاکستان اور بھارت کی ٹیمیں 16 نومبر کو گروپ مرحلے کے دوران آمنے سامنے ہوں گی، جبکہ ایونٹ میں سپر فور مرحلہ شامل نہیں، اس لیے دونوں ٹیموں کے درمیان زیادہ سے زیادہ دو مقابلے ممکن ہوں گے۔ ہر گروپ کی دو بہترین ٹیمیں سیمی فائنل میں جگہ بنائیں گی، اور فائنل 23 نومبر کو کھیلا جائے گا۔ یاد رہے کہ گزشتہ ایڈیشن میں افغانستان نے سری لنکا اے کو شکست دے کر ٹائٹل اپنے نام کیا تھا۔
تازہ ترین خبروں کے لیے پی این آئی کا فیس بک پیج فالو کریں
