بھارت چیمپئنز ٹرافی کیلئے نہ آیا تو۔۔؟ پاکستان نے بڑا فیصلہ کرلیا

لاہور (پی این آئی ) پاکستان کرکٹ بورڈ چیمپئنز ٹرافی کے تمام میچز پاکستان میں کرانے کے مؤقف سے نہیں ہٹے گا اور پاکستان کرکٹ بورڈ ایک ہی مؤقف برقرار رکھے گا۔

چیمپئنز ٹرافی 2025ء کی میزبانی پاکستان کے پاس ہے لیکن ان دنوں پلان بی اور ہائی برڈ وینیو کی خبریں سامنے آرہی ہیں کہ آئی سی سی کے سالانہ اجلاس میں اس حوالے سے گفتگو ہو گی۔آئی سی سی کا سالانہ اجلاس 19 سے 22 جولائی تک سری لنکا کے دارالحکومت کولمبو میں شیڈول ہے جس میں چیئرمین پی سی بی محسن نقوی کی شرکت بھی متوقع ہے۔

’جیو نیوز‘ کے مطابق ذرائع کا کہنا ہے کہ پاکستان چیمپئنز ٹرافی کے تمام میچز پاکستان میں کرانے کے مؤقف سے نہیں ہٹے گا بلکہ ‘پاکستان کا ایونٹ پاکستان میں’ کے مؤقف کو برقرار رکھے گا۔پی سی بی تین وینیوز پر تمام 8 ٹیموں کے میچز کے انتطامات کرنے میں مصروف ہے، چیمپئنز ٹرافی کے لیے اسٹیڈیمز کی اپ گریڈیشن کے لیے بھاری اخراجات کیے جا رہے ہیں، ہائبرڈ اور پلان بی کی باتیں ہونے سے متاثر ہوکر پی سی بی اپنے انتظامات نہیں روکے گا۔

ذرائع کا کہنا ہے کہ آئی سی سی کے اجلاس میں پاکستان اپنا مؤقف زور دار طریقے سے پیش کرے گا، پلان بی رکھنا آئی سی سی کا کام ہے، پاکستان کا کام اپنے مؤقف کے ساتھ آگے بڑھنا ہے۔ ذرائع کا کہنا ہے کہ بھارت کے سوا چیمپئنز ٹرافی کے لیے کوالیفائی کرنے والی تمام ٹیمیں پاکستان میں کھیل چکی ہیں، بھارت کا پاکستان نہ آنے کا مؤقف کمزور ہے، اگر ایسا ہوا تو پاکستان بھی 2026ء کے ٹی ٹونٹی ورلڈ کپ میں شرکت کرنے کے لیے بھارت نہیں جائے گا کیونکہ ماضی کے مقابلے میں پاکستان اس حوالے سے مستقبل میں سخت مؤقف اپنائے گا۔