وزیراعظم شہباز شریف نے چئیرمین پی سی بی کیلئے کس کو نامزد کر دیا؟ اہم خبر

اسلام آباد (پی این آئی) وزیراعظم شہباز شریف نے نجم سیٹھی پر مکمل اعتماد کا اظہار کرتے ہوئے چیئرمین پی سی بی کے لیے نامزد کر دیا۔تفصیلات کے مطابق وزیراعظم شہباز شریف سے پاکستان کرکٹ بورڈ کی مینجمنٹ کمیٹی کے چیئرمین نجم سیٹھی نے ملاقات کی ہے۔”جیو نیوز” کے مطابق وزیراعظم نے نجم سیٹھی پر مکمل اعتماد کا اظہار کیا ہے اور انہیں چیئرمین پی سی بی کے لیے امیدوار نامزد کردیا، وزیراعظم نے نجم سیٹھی کو جلد پی سی بی چیئرمین کے الیکشنز مکمل کرنے کی ہدایت بھی کردی۔

وزیراعظم شہباز شریف جلد 2 نام پی سی بی گورنرز بورڈ میں بھجوائیں گے جس میں دوسرا نام مصطفیٰ رمدے کا ہونے کا امکان ہے۔نجم سیٹھی نے وزیراعظم کو ایشیا ءکپ اور بھارت میں ورلڈ کپ سے متعلق بریفنگ دی اور اس حوالے سے نجم سیٹھی نے ایشیاء کپ اور ورلڈ کپ سے متعلق شہباز شریف سے رائے مانگ لی ہے۔بریفنگ میں انہوں نے بتایا کہ پی سی بی کا 2014 کا آئین مکمل بحال ہوچکا ہے، 90 فیصد سے زیادہ اضلاع میں پی سی بی ڈسٹرکٹس کا الیکشن مکمل ہوگیا ہے۔بریفنگ میں وزیراعظم کو بتایا گیا کہ ریجنز کے 80 فیصد الیکشن مکمل ہوچکے ہیں، ریجنل انٹر ڈسٹرکٹ انڈر 19 کرکٹ ٹورنامنٹ 15 جون سے شروع ہو رہا ہے، ایک سالہ کرکٹ کیلنڈر مکمل کر لیا گیا ہے جس کا جلد اعلان ہوگا۔وزیراعظم کو بتایا گیا کہ تمام ڈپارٹمنٹس نے اپنی کرکٹ ٹیمیں بنانا شروع کردی ہیں، پی سی بی کے آئین بحالی پر وزیراعظم شہباز شریف نے نجم سیٹھی کو مبارکباد بھی دی۔