انٹرنیشنل کرکٹ کونسل (آئی سی سی) نے ٹی ٹوئنٹی ورلڈ کپ 2026 سے قبل فل ممبر ٹیموں کے میچز کی تفصیلات جاری کر دی ہیں۔ ٹی ٹوئنٹی ورلڈ کپ سے قبل فل ممبر ٹیموں کی تیاریاں حتمی مرحلے میں داخل ہو گئی ہیں اور اب کسی فل ممبر کی مزید کسی سیریز کا امکان نہیں ہے۔
پاکستان ٹیم ٹی ٹوئنٹی ورلڈ کپ سے قبل مجموعی طور پر 6 میچز کھیلے گی، جن میں 3 میچز جنوری میں سری لنکا میں اور 3 ہوم گراؤنڈ پر آسٹریلیا کے خلاف ہوں گے۔ افغانستان، بنگلا دیش، آئرلینڈ اور زمبابوے ٹی ٹوئنٹی ورلڈ کپ سے قبل کوئی میچ نہیں کھیلیں گے، جبکہ آسٹریلیا پاکستان کے خلاف 3 ٹی ٹوئنٹی میچز کھیلے گی۔ انگلینڈ سری لنکا میں جنوری میں 3 ٹی ٹوئنٹی میچز کھیلے گی اور بھارتی ٹیم ہوم گراؤنڈ پر 5 ٹی ٹوئنٹی میچز کی سیریز کھیل رہی ہے۔ بھارت جنوری میں نیوزی لینڈ کے ساتھ بھی 5 ٹی ٹوئنٹی میچز کی ہوم سیریز کھیلے گی۔ جنوبی افریقہ بھارت میں سیریز کھیل رہی ہے، جبکہ 3 ٹی ٹوئنٹی میچز کے لیے ویسٹ انڈیز کی ٹیم جنوبی افریقہ کا دورہ کرے گی۔
دسمبر اور جنوری میں بھارتی ٹیم سب سے زیادہ 10 ٹی ٹوئنٹی میچز کھیلے گی، جبکہ جنوبی افریقہ کی ٹیم 8 میچز کھیلے گی اور پاکستان کرکٹ ٹیم ٹی ٹوئنٹی ورلڈ کپ سے قبل 6 میچز کھیلے گی۔ میزبان سری لنکا ہوم گراؤنڈ پر 6 میچز کھیلے گی اور نیوزی لینڈ کی ٹیم 5 میچز کی سیریز کھیلے گی۔ آسٹریلیا، انگلینڈ اور ویسٹ انڈیز کو 3-3 ٹی ٹوئنٹی میچز کھیلنے کا موقع ملے گا۔
آئی سی سی ٹی ٹوئنٹی ورلڈ کپ 7 فروری سے 8 مارچ تک بھارت اور سری لنکا میں کھیلا جائے گا۔
تازہ ترین خبروں کے لیے پی این آئی کا فیس بک پیج فالو کریں
