آئندہ برس بھارت اور سری لنکا میں ہونے والے ٹی 20 ورلڈ کپ 2026 کے لیے تمام 20 ٹیموں کی تصدیق ہو گئی ہے۔
متحدہ عرب امارات نے ایشیا/ایسٹ ایشیا-پیسیفک کوالیفائر میں جاپان کو 8 وکٹوں سے شکست دے کر کوالیفائی کیا۔ اس میچ میں حیدر علی نے 3 وکٹیں لیں اور اوپنرز علی شان شرفو اور محمد وسیم کی 70 رنز کی شراکت نے جیت میں اہم کردار ادا کیا۔ یو اے ای، نیپال اور عمان وہ آخری تین ٹیمیں ہیں جنہوں نے رواں ہفتے کوالیفائی کر کے مکمل 20 ٹیموں کی فہرست کو مکمل کیا۔
میزبان بھارت اور سری لنکا کے علاوہ، ورلڈ کپ 2024 کی ٹاپ 7 ٹیمیں — افغانستان، آسٹریلیا، بنگلہ دیش، انگلینڈ، جنوبی افریقہ، امریکا اور ویسٹ انڈیز — نے براہ راست 2026 ورلڈ کپ میں جگہ بنائی۔ آئی سی سی رینکنگ کی بنیاد پر نیوزی لینڈ، پاکستان اور آئرلینڈ نے بھی ٹورنامنٹ میں رسائی حاصل کی۔
کینیڈا نے امریکا کے ریجنل کوالیفائر میں کامیابی حاصل کی جبکہ اٹلی پہلی بار ٹی 20 ورلڈ کپ میں شرکت کرے گا۔ نیدرلینڈز نے یورپ کے کوالیفائر ٹورنامنٹ سے جگہ بنائی، اور افریقہ سے نمیبیا اور زمبابوے نے کوالیفائی کیا۔
ورلڈ کپ 2026 کا فارمیٹ پچھلے ایڈیشن جیسا ہی ہوگا۔ تمام 20 ٹیمیں 4 گروپس میں تقسیم ہوں گی، ہر گروپ میں 5 ٹیمیں ہوں گی اور ہر ٹیم اپنے گروپ کی دیگر 4 ٹیموں سے ایک بار کھیلے گی۔ ہر گروپ کی 2 ٹاپ ٹیمیں “سپر 8” مرحلے میں جائیں گی، جہاں 4،4 ٹیموں کے دو گروپس ہوں گے۔ ان گروپس کی ٹاپ 2 ٹیمیں سیمی فائنل کھیلیں گی، اور پھر سیمی فائنلز کے فاتح ٹیمیں فائنل میں آمنے سامنے ہوں گی۔
تازہ ترین خبروں کے لیے پی این آئی کا فیس بک پیج فالو کریں
