آئی فون، پاسپورٹ کے بعد بھارتی کپتان روہت شرما چیمپئنز ٹرافی بھول گئے

دبئی(پی این آئی) کبھی فون تو کبھی پاسپورٹ بھولنے والے بھارتی کرکٹ ٹیم کے کپتان روہت شرما اس بار چیمپئنز ٹرافی
2025ء جیتنے کے بعد ٹرافی ہی بھول گئے۔

مختلف سوشل میڈیا پلیٹ فارمز پر وائرل ہونے والی ایک ویڈیو میں روہت شرما پریس کانفرنس میں شرکت کے بعد چیمپئنز ٹرافی کو بھول کر جاتے ہوئے دکھائی دے رہے ہیں۔خیال رہے کہ بھارتی کرکٹ ٹیم کے کپتان اپنی بھولنے کی عادت کے سبب پہلے ہی بدنام ہیں، کبھی مناسب وقت پر مناسب الفاظ کا استعمال بھول جاتے ہیں تو کبھی اپنا آئی فون اور پاسپورٹ تک بھول جاتے ہیں۔ یاد رہے کہ 2 برس قبل ایشیاء کپ کی جیت کے بعد بھارتی کپتان سری لنکا سے واپس بھارت جانے کے لیے اپنا پاسپورٹ ہوٹل میں ہی بھول گئے تھے۔

اس کے علاوہ پاکستانی کرکٹ ٹیم کے بلے باز امام الحق نے اپنے ایک انٹرویو میں انکشاف کیا تھا کہ قومی ٹیم کے سابق کپتان بابر اعظم نے بھارتی ٹیم کے کپتان روہت شرما کا آئی فون گُم ہونے سے بچایا تھا۔ امام الحق کے مطابق ورلڈ کپ 2023ء سے قبل تمام ٹیموں کے کپتانوں کا میٹ اپ ہوا تھا، اس وقت روہت شرما نے نئے آئی فون اور ایئر پوڈز خریدے تھے، پہلے انہوں نے اپنا آئی فون وہاں چھوڑ دیا اور پھر ہر 2 منٹ بعد ان کے ایئر پوڈز گم ہو رہے تھے، اس وقت وہاں موجود بابر اعظم نے 2 بار روہت شرما کو ان کا آئی فون واپس کیا۔