کراچی(پی این آئی)انگلش کرکٹ بورڈ نے بھی چیمپئنز ٹرافی 2025 پاکستان میں ہی کروانے کی حمایت کردی۔
ای سی بی کے چیف ایگزیکٹو رچرڈ گولڈ نے کہا کہ ہم چیمپئنز ٹرافی کا پاکستان میں ہی انعقاد یقینی دیکھنا چاہتے ہیں، ہم پاک بھارت ٹیسٹ کی اپنے ملک میں میزبانی کی بھی خواہش رکھتے ہیں، حالیہ آئی سی سی میٹنگز میں دونوں بورڈز کے حکام کا موڈ خوشگوار تھا، مسئلہ تب ہوتا ہے جب سیاست حائل ہو۔
تفصیلات کے مطابق پاکستان کو آئندہ برس فروری مارچ میں چیمپئنز ٹرافی کی میزبانی کرنا ہے ، بھارت اپنے میچز نیوٹرل وینیو پر منتقل کرانے کی کوشش میں ہے ،دیگر باقی ٹیموں کو پاکستان کے سفر میں کوئی مسئلہ نہیں ہے، انگلینڈ نے بھی مکمل ایونٹ پاک سرزمین پر ہی ہونے کی حمایت کردی۔اس حوالے سے ای سی بی کے چیف ایگزیکٹو رچرڈ گولڈ نے کہا کہ ہم چیمپئنز ٹرافی کا پاکستان میں ہی انعقاد یقینی دیکھنا چاہتے ہیں اور اس حوالے سے پی سی بی کے ساتھ ہیں۔ انھوں نے پاکستان اور بھارت کے درمیان ٹیسٹ میچ کی اپنے ملک میں میزبانی کی بھی خواہش ظاہر کردی۔
گزشتہ کچھ عرصے سے روایتی حریفوں کے انگلینڈ میں ٹیسٹ کی باتیں ہورہی ہیں، لارڈز، اوول اور ایجبسٹن میزبانی کی خواہش بھی ظاہر کرچکے۔رچرڈ گولڈ نے کہا کہ ہر کوئی اس میچ کی میزبانی چاہتا ہے، میں نہیں سمجھتا کہ انگلینڈ میں ایسے میچ کا انعقاد ناممکن ہے، پاکستان کرکٹ بورڈ ، بی سی سی آئی اور دونوں ممالک کے درمیان سیاست چلتی رہتی ہے، گزشتہ ہفتے ہم سری لنکا میں آئی سی سی میٹنگز کیلئے تھے جہاں پر ہم نے پاکستان اور بھارت کے کرکٹ حکام کو ایک دوسرے کے ساتھ خوشگوار موڈ میں دیکھا، مسئلہ تب ہوتا ہے جب اس میں سیاست کا عنصر آجائے۔
تازہ ترین خبروں کے لیے پی این آئی کا فیس بک پیج فالو کریں
