شاہین آفریدی نے عمران خان اور وسیم اکرم کو بھی پیچھے چھوڑ دیا

لاہور (پی این آئی ) شاہین شاہ آفریدی ٹیسٹ کرکٹ میں 100 وکٹیں لینے والے پاکستان کے 19ویں اور 11ویں تیز گیند باز بن گئے ہیں۔ انہوں نے گال میں سری لنکا کے خلاف پہلے ٹیسٹ میچ کے اپنے دوسرے اوور میں اوپنر نشان مدوشکا کو آؤٹ کر کے یہ کارنامہ انجام دیا۔

صرف 23 سال کی عمر میں شاہین کی 100 وکٹیں صرف 26 میچوں میں 25 سے کم کی اوسط سے آئی ہیں۔ ان کے شاندار ریکارڈ میں ٹیسٹ کرکٹ میں 4 مرتبہ اننگز میں 5 یا زیادہ وکٹیں اور ایک مرتبہ میچ میں 10 وکٹیں بھی شامل ہیں۔ قومی ٹیم کے سابق کپتان عمران خان اور وسیم اکرم جیسے لیجنڈ باؤلرز نے 100 ٹیسٹ وکٹیں مکمل کرنے کے لیے بالترتیب 26 اور 30 ٹیسٹ میچ کھیلے تھے ۔ اس سے شاہین آفریدی کے پاس قابل ذکر صلاحیت اور صلاحیت کی عکاسی ہوتی ہے۔ لیگ سپنر یاسر شاہ صرف 17 ٹیسٹ میں 100 ٹیسٹ وکٹیں مکمل کرنے والے تیز ترین پاکستانی باولر ہیں۔ وقار یونس اور سعید اجمل 19،19 میچز میں یہ اعزاز حاصل کرکے مشترکہ طور پر دوسرے، محمد آصف 20 میچز میں 100 وکٹیں مکمل کرکے تیسرے، فضل محمود 22 میچز میں یہ اعزاز حاصل کرکے چوتھے جب کہ ثقلین مشتاق اور دنیش کنیریا 23،23 میچز میں 100 ٹیسٹ شکار کرکے مشترکہ طور پر 5ویں نمبر پر موجود ہیں۔