کراچی میں گزشتہ دو روز کے دوران مرغی کے گوشت کی فی کلو قیمت میں 200 روپے تک اضافہ ریکارڈ کیا گیا ہے۔
رپورٹس کے مطابق چند روز قبل مرغی کا گوشت 500 سے 550 روپے فی کلو میں دستیاب تھا، جو اب شہر کے مختلف علاقوں میں 750 سے 850 روپے فی کلو میں فروخت ہو رہا ہے۔ قیمتوں میں اس تیز اضافے نے متوسط اور کم آمدنی والے طبقے کے لیے مرغی کا گوشت خریدنا مشکل بنا دیا ہے۔
واضح رہے کہ حکومت کی جانب سے مرغی کے گوشت کی سرکاری قیمت 670 روپے فی کلو مقرر کی گئی ہے، تاہم مارکیٹ میں اس نرخ پر گوشت دستیاب نہیں ہے۔
شہریوں کا کہنا ہے کہ سرکاری نرخ نامے پر عملدرآمد نہ ہونے کے باعث دکاندار من مانے ریٹ وصول کر رہے ہیں، جبکہ انتظامیہ کی جانب سے مؤثر کارروائیاں نظر نہیں آ رہیں۔
دوسری جانب دکانداروں کا مؤقف ہے کہ وہ خود بھی مہنگی مرغی خریدنے پر مجبور ہیں۔ پولٹری دکانداروں کے مطابق پولٹری فارمرز انہیں مرغی زیادہ قیمت پر فراہم کر رہے ہیں، جس کے باعث وہ سرکاری نرخ پر گوشت فروخت کرنے سے قاصر ہیں۔
پولٹری ایسوسی ایشن کا کہنا ہے کہ فیڈ کی قیمتوں میں اضافہ، موسمی اثرات اور سپلائی میں کمی مرغی کے گوشت کی قیمتوں میں اضافے کی بڑی وجوہات ہیں۔
تازہ ترین خبروں کے لیے پی این آئی کا فیس بک پیج فالو کریں
