اسلام آباد میں مارگلہ کی پہاڑیوں سے نکلنے والے نالوں میں طغیانی کے باعث چک شہزاد اور پارک روڈ کے برساتی نالوں میں پانی کی سطح خطرناک حد تک بلند ہوگئی ہے۔ مقامی افراد کے مطابق انہوں نے انتظامیہ کو کئی بار اطلاع دی، لیکن تاحال کوئی امدادی ٹیم موقع پر نہیں پہنچی۔
دوسری جانب محکمہ موسمیات نے خبردار کیا ہے کہ آج ہونے والی موسلادھار بارش کے باعث اسلام آباد، راولپنڈی، گوجرانوالہ، لاہور اور سیالکوٹ کے نشیبی علاقوں کے زیر آب آنے کا خدشہ ہے۔ بالائی خیبرپختونخوا، دیر، سوات، شانگلہ، مانسہرہ، کوہستان، ایبٹ آباد، مری، گلیات اور آزاد کشمیر کے برساتی ندی نالوں میں بھی پانی کے بہاؤ میں خطرناک حد تک اضافے کا امکان ظاہر کیا گیا ہے۔
مزید برآں، لینڈ سلائیڈنگ کے باعث خیبرپختونخوا کے پہاڑی علاقوں، گلگت بلتستان، کشمیر، مری اور گلیات میں ٹریفک کی روانی متاثر ہونے کا بھی خطرہ ہے۔ فلڈ فورکاسٹنگ ڈویژن کے مطابق، دریائے سندھ میں گڈو اور سکھر بیراج کے مقام پر نچلے درجے کا سیلاب ہے، جب کہ دیگر دریا معمول کے مطابق بہہ رہے ہیں۔
تازہ ترین خبروں کے لیے پی این آئی کا فیس بک پیج فالو کریں
