لاہور ہائی کورٹ راولپنڈی بینچ نے توہینِ عدالت پر وکیل فاضل صدیقی کو ایک ماہ قید کی سزا سنا دی۔
عدالتی حکم کے بعد سپریم کورٹ کے سینئر وکیل فاضل صدیقی کو پولیس نے حراست میں لے لیا۔فاضل صدیقی نے شہری عثمان کی جانب سے راولپنڈی کنٹونمنٹ بورڈ کے خلاف درخواست دائر کی تھی، عدالت نے ریمارکس دیے کہ قانون کے مطابق یہ درخواست بنتی ہی نہیں۔وکیل فاضل صدیقی نے درخواست سماعت کے لیے مقرر کرنے پر اصرار کیا تھا تاہم عدالت نے ٹیکنیکل وجوہات پر درخواست مقرر کرنے سے معذرت کر لی۔
وکیل فاضل صدیقی اور جسٹس مرزا وقاص رؤف کے درمیان تلخی ہوئی جس پر عدالت نے فاضل صدیقی کو توہینِ عدالت کا مرتکب قرار دے کر گرفتار کرنے کا حکم دے دیا۔وکلاء نے فاضل صدیقی کو سزا سنانے اور گرفتار کرنے پر احتجاج کیا تاہم پولیس نے فاضل صدیقی کو کنٹرول روم منتقل کر دیا ہے۔
احکامات منسوخ، سزا واپس،بعدازاں ہائی کورٹ راولپنڈی بار اور پاکستان بار کونسل کی مداخلت پر یہ معاملہ حل کر لیا گیا۔پاکستان بار کونسل کے حسن رضا پاشا اور ہائی کورٹ بار راولپنڈی کے صدر ملک جواد خالد کی درخواست پر توہینِ عدالت کے احکامات منسوخ کر دیے گئے۔سیکریٹری جنرل مرزا شبیر نے بتایا کہ عدالتی احکامات کی منسوخی پر فاضل صدیقی کو رہا کر کے سزا کے احکامات واپس لے لیے گئے ہیں۔
تازہ ترین خبروں کے لیے پی این آئی کا فیس بک پیج فالو کریں
